L'uomo del Sud
|
C'l artìcul chè 'l è scrit in
Miranduléś |
 The Southerner
| ||
| L'uomo del Sud | ||
 La Betty Field e Zachary Scott in na figùra dal film | ||
| ’L óm dal Sud 1945 | ||
|---|---|---|
| Regìa: Jean Renoir | ||
| Scritōr: Hugo Butler • George Sessions Perry Jean Renoir • William Faulkner • Nunnally Johnson | ||
| Atōr: Zachary Scott • Betty Field • J. Carrol Naish Beulah Bondi • Percy Kilbride • Charles Kemper | ||
| Müsica: Werner Janssen | ||
| Léngua: Ingléś | ||
| Dürä dal film: 92 minüt | ||
| Nasiōṅ: Stat Unî | ||
L'uomo del Sud (’L óm dal Sud) 'l è 'n film dramàtic americàṅ dal 1945 ad Jean Renoir girâ in biànc e négar in Califòrgna anc se ambintâ in dal Tèxas. Cl'òpra chè la gh'à abû dimóndi prubléma a Dixie, i stat americàṅ dal Sud, tant ch'in dal Tennessee 'l è stâ pruibî par dagnóra trént'an su deciśiòṅ ad Lloyd Binford ch'al gh dava adòs parchè, a sò dita, al figuràva i cuntadèṅ meridiunài cuma di espunènt dal white trash. Anc al Ku Klux Klan al s è mis cóntar, invidànd i sudìsta a lasàr vōd i cìnema i du a s dava cal film chè.
La pelìcula, candidàda a tri Prèmi Òscar e dvintàda 'd dumìni pùblic, l'è stada premiàda a 'l 7im Fèstival ad Venèsia.
Sunt
Sam Tucker (Zachary Scott) al fà 'l cuntadèṅ sóta padròṅ in dla campàggna dal Tèxas in du al sòna sù 'l cutòṅ insém a sò sîṅ Pete (Paul E. Burns) e a sò mujér Nona (Betty Field). La còpia la gh'à du baghét da tiràr sù, la Daisy (Jean Vanderwilt) e Jot (Jay Gilpin), e na “nóna” (Beulah Bondi) minga tant gustóśa da mantgnìr. Quànd Pete al mōr par la fadìga sóta 'l Sōl, Sam al decìd ad mulàr incòsa e 'd tōr in afìt un sit da cultivàr par sò cònt.
Al padròṅ al gh śibìs un camp bandunâ e sut davśèṅ a 'l fiùm pîna 'd śgarbàsa cun na cà 'd légn tuta da mét'r a pòst. La famìja Tucker la gh dà dèntar dimóndi ma la vita lè l'è piutòst dûra parchè al pós al n dà minga àqua e dal vòlti a n gh'è gnanc da magnàr in tavla. Sam al próa a far-'s amìg al cuntadèṅ sò vśèṅ, Henry Devers (J. Carrol Naish), śibénd-ag anc na bucàcia ma chi lò, ch'al vliva cumpràr al sò camp par quàtar sòld, 'l al para via.
Quànd Jot al s mala 'd pelàgra, Sam al próa a dmandàr dal lat a Henry che però al gh diś ch'al gh'à da druàr-al tut par far dla śóta p'r i sò nimài, sōl sò fiōla Becky (Noreen Nash) a pâr ch'la gh'àppia dal critèri. Al sò amìg Tim (Charles Kemper) al gh śibìs 'd andàr a lauràr in fàbrica p'r avēr un stipéndi fis ma Sam, 'd acòrd anc cun sò mujér, al decìd 'd andàr avànti.
Quànd finalmènt in di camp a nas al cutòṅ a riva na pióva 'd c'l àtar mónd ch'la pòrta n'inundasiòṅ.