José Mourinho

 Miranduléś

C'l artìcul chè 'l è scrit in Miranduléś

'L alenadōr José Mourinho

«

A me non piace la prostituzione intel­lettuale, mi pia­ce l’onestà intellettuale e mi sem­bra che negli ultimi giorni ci sia stata una grandissima manipo­lazione intellettuale e un gran­dissimo lavoro organizzato per cambiare e manipolare l’opinione pubblica e questo, secondo me, è un lavoro fantastico di un mondo che non è il mio, che lo sarà fino a quando lavorerò nel calcio, ma che davvero non è il mio mondo. Però questa manipolazione è sta­ta un successo: negli ultimi due giorni, infatti, non si è parlato di una Roma con grandissimi cam­pioni, con tanti giocatori che io volevo avere con me, e che finirà la stagione con śero tituli. Non si è parlato di un Milan che finirà la stagione con śero tituli nonostan­te abbia tutto ciò di cui una squa­dra ha bisogno. E non si è parla­to di una Juventus che ha con­quistato tanti, ma tanti punti con errori arbitrali.»

(IT)(Dichiarasiòṅ ad Mourinho, 4 Mars dal 2009)

«

A mè a n m piàś minga la prustitusiòṅ dla mènt, a m piaś la mènt quand l'è unèsta e a m pâr che in di ùltim dè a gh sia stada na manipulasiòṅ bèla granda dal mènt e un lavōr bèl grôs fat sù par cambiàr e manipulàr l'upignòṅ dla gint e quést, par mè, 'l è un lavōr fantàstic 'd un mónd ch'al n è briśa al mio, che al sarà acsè in fîṅ ch'a lavurarò in dal mónd dla balòṅ, ma che al n è minga al mè mónd, dabòṅ. Però cla manipulasiòṅ chè l'è stada un sucès: in di ùltim du dè, difàti, a n s è minga dascórs dna Roma cun di campiòṅ dimóndi grand, cun tant ad chi śugadōr ch'a 'rév vlû mèg, e che la finirà la stagiòṅ cun śèro tìtui. A n s è mia dascórs 'd un Milan ch'al finirà la stagiòṅ cun śèro tìtui nunustàn­t 'l àppia tut quél ch'a gh vōl par na squàdra. E a n s è minga dascórs 'd na Juventus ch'l'à ciapâ dimóndi, un muć ad punt cun di erōr di àrbitr.»

(MUD)

José Mário dos Santos Félix Mourinho, cgnusû semplicemènt cuma José Mourinho (IPA: /ʒuˈzɛ moˈɾiɲu/), 'l è 'n alenadōr purtughéś nâ a Setùbal (32 km a sud ad Liśbóna, capitàla dal Purtugàl) al 26 ad Śnar dal 1963. In dla sò caréra 'l à 'linâ dimóndi di più grand club 'd Europa cuma l'Inter, al Real Madrid, al Chelsea e al Porto, vinsénd du Champions League e soquànt scudét.

Al sò scutmàj, sarnî diretamènt da lò durànt i sò an lundinéś, 'l è The Special One (Al specialòṅ).

Al sò valōr 'l è arcgnusû da tut, anc da 'l Istitùt Internasiunàl ad Stòria e Statìstichi dal Balòṅ (IFFHS) ch'al 'l à elèt par tri vòlti (2004, 2005 e 2010) al mijór alenadōr dal mónd.

Pulèmichi

Mourinho al s la rid durànt i sò an a l'Inter

Mourinho 'l è un persunàǵ dimóndi cuntruvèrs par via dal sò caràtar spavàld (in dal Setémbar dal 2008 'l à dit a la Gazzetta dello Sport ch'al pénsa ch'a n gh sia ninsòṅ méj ad lò) ch'al 'l à da spés mis dèntar a dal pulèmichi in dal mónd dal balòṅ.

• In dal 2009, mèntar 'l alenàva i milanéś dl'Inter, l'à dat adòs a la Roma e al Milan, dgénd che i n arévan vins gnint in dla stagiòṅ.
• Al 29 ad Nuvémbar dal 2010 'l à ciapâ na bèla patóna cun al sò Real Madrid pardénd par 5-0 in cà dal Barcellona. I catalàṅ i gh'àṅ fat védar la manita (la manìna) par tōr-'l in gir.
• In dal 2005 'l à dat dal voyeur (guardòṅ) a 'l alenadōr d'l Arsenal Arsène Wenger sustgnénd ch'al francéś al gh'is n'usesiòṅ p'r al Chelsea.
• A la fîṅ dla gara Atalanta-Inter dal 13 ad Dicémbar dal 2009 al vèṅ deferî a la cumisiòṅ disiplinàra p'r avér dit dal bruti paròli a 'l giurnalìsta spurtìṿ Andrea Ramazzotti e avér-al tòlt p'r i bras. Al purtughéś al ciàpa 13.000 euro ad multa.
• Dòp la gara Inter-Sampdoria dal 22 ad Favràr dal 2010, finìda 0-0, al ciàpa tri giurnàdi ad squalìfica e 40.000 euro ad multa parchè 'l iva dit dal bruti paròli a 'l àrbitr e i sò culaburadōr durànt la partìda e p'r avér far al ségn dal manéti.
• Al 23 ad Nuvémbar dal 2010 al fà casàr fóra ad prupòśit du di sò śugadōr (Xabi Alonso e pò Sergio Ramos) durànt i ùltim minùt dla gara ad Champions League fra Real Madrid e Ajax par far-i squalificàr in dla partìda dòp ch'la n cuntàva gnint. 'L è pò stâ punî anca lò cun na giurnàda.
• Al 27 'd Avrìl dal 2011, dòp ch'l éra stâ butâ fóra durànt la gara ad semifinàl dla Cópa di Campiòṅ fra i Blancos e al Barça, al dà adòs a 'l àrbitr durànt la cunferénsa stampa cun i giurnalìsta (“Parchè? Parchè? Mè a spér 'd avér un dè na rispòsta. Parchè Ovrebo, Busacca, De Bleeckere e adès Stark?”).
• A 'l aeropòrt, al 4 ad Maǵ dal 2011, turnànd a cà dòp èsar stâ eliminâ da la Cópa di Campiòṅ p'r òpra di rivài dal Barcellona, Mourinho (e al sò cunasiunàl Cristiano Ronaldo), i faṅ inténdar 'd èsar stâ rapinâ faghénd al gèst dla maṅ ch'la prila cun i dî ch'i gìran 'd intóran.
• Al 14 ad Mars dal 2011 Mourinho e al Real Madrid i dmàndan di cuntrói più stric in sal doping in di cunfònt di śugadōr dal Barcellona e dal Valencia. Al gh rispónd al 30 ad Maǵ dal 2011 al śugadōr dal Barça Gerard Piqué durànt la fèsta par la vìnsita dla Cópa di Campiòṅ: «Nuàtar a n s drughém minga, a n tirém minga, a n cumprém minga i àrbitr, semplicemènt a śughém a 'l futbol».

Culegamènt estéran

• (EN) Al sò fan club