John Cale

Da Wikipedia.

C'l artìcul chè 'l è scrit in Miranduléś Emiliàn

John Cale tòlt śò in dal 1980


«
Who's in Charge? Is it the army? Is it the money? Are you responsible? I'm not responsible. You wanna die now? Why not, it's a good day to die.»
(EN)(Who's in Charge?, 1994)
«
Ad chi è-la la cólpa? È'l 'l èśèrcit? Èṅ-i i bèsi? Sē't tè al respunsàbil? Nò a n sòṅ minga respunsàbil. Vō't murìr adès? Parchè nò, 'l è un dè bòṅ par murìr.»
(MUD)


John Cale (Garnant, 9 ad Mars dal 1942) 'l è 'n muśicìsta, cantautōr, sunadōr e prudutōr galéś, cgnusû p'r èsar stâ òṅ di fundadōr di Velvet Underground. 'L è bòṅ ad sunàr praticamènt tut i strumènt muśicài.

In dla sò caréra 'l à prudót o culaburâ a i lavōr 'd artìsta cuma, fra i àtar, Lou Reed, John Cage, Brian Eno, Patti Smith, The Stooges, Manic Street Preachers, Marc Almond, Happy Mondays e Siouxsie and the Banshees. Cun la cantànta ad cal grup lè, la Siouxsie Sioux, Cale al s è śibî in dal 1998 da 'l viṿ a 'l Paradiso 'd Amsterdam in un duét dal braṅ Murdering Mouth dòp avér anc prudót 'l ùltim disc fat dal grup ingléś, The Rapture dal 1995.

In dal 2010 'l è dvintâ mémbar d'l Órdan d'l Impēr Britànic, òṅ di arcgnusimènt più impurtànt dal Régn Unî.

Biugrafìa

In dal 1965 Cale al cgnós Lou Reed che in alóra al lavuràva cuma cumpuśidōr ad canti pop par di àtar e al s rénd cònt 'd avér cumpàgn a lò la pasiòṅ p'r al rock'n'roll e par dar vita a di quèi nóṿ e sperimentài. Sèg al mét insém al grup di Velvet Underground. Al prim disc 'l è dal 1967 e al gh'à al tìtul ad The Velvet Underground & Nico. Cla Nico lè l'è na mudèla ch'la gh'iva dâ na maṅ. Dòp al secónd disc White light/White heat, Cale al lasa 'l grup par tacàr na caréra da par lò.

Dòp siē disc fat catàr in di negòsi fra 'l 1970 e 'l 1975, in dal 1977 al pùblica 'l EP Animal Justice e durànt i sò cuncèrt al taca a mét'r-'s in fàcia na mascra da śugadōr 'd hockey in sal giàs, prima ch'al faśìs Jason Voorhees in di sò film ad scarésa ad Venerdì 13. Cale al strica 'l òć a 'l punk ch'l è drē a nàsar in chi an lè. Durànt na sò eśibisiòṅ da 'l viṿ, drugâ pódag ad cucaìna, al taja la tèsta a 'n pui cun un manarèṅ. Par prutèsta, i àtar mémbar dal grup i móntan śò da 'l palc.

Dòp da piò ad quarànt'an in sal gir, John Cale al cuntìnua cun i sò impégn. In dal 2007 'l à fat vgnir fóra na racòlta da 'l viṿ (Circus Live), rigistrâ durànt un tour europeo in dua 'l à sunâ anc a Milàn e Urbìn.

Discugrafìa

Da par lò

Àlbum in studi

  • 1967 - Hallelujah
  • 1970 - Vintage Violence
  • 1971 - Church of Anthrax (insém a Terry Riley)
  • 1972 - The Academy in Peril
  • 1973 - Paris 1919
  • 1974 - Fear
  • 1975 - Slow Dazzle
  • 1975 - Helen of Troy
  • 1981 - Honi Soit
  • 1982 - Music For A New Society
  • 1983 - Caribbean Sunset
  • 1985 - Artificial Intelligence
  • 1989 - Words for the Dying
  • 1990 - Songs for Drella (insém a Lou Reed)
  • 1990 - Wrong Way Up (insém a Brian Eno)
  • 1994 - Last Day on Earth (insém a Bob Neuwirth)
  • 1996 - Walking on Locusts
  • 1998 - Nico: Dance Music
  • 2003 - HoboSapiens
  • 2005 - BlackAcetate
  • 2012 - Shifty Adventures in Nookie Wood
  • 2016 - M:FANS
  • 2023 - Mercy

Racòlti

  • 1977 - Guts
  • 1994 - Seducing Down the Door
  • 1996 - The Island Years
  • 1999 - Close Watch: An Introduction to John Cale
  • 2007 - Gold

Da 'l Viṿ

  • 1979 - Sabotage/Live
  • 1984 - John Cale Comes Alive
  • 1991 - Even Cowgirls Get the Blues
  • 1992 - Fragments of a Rainy Season
  • 2007 - Circus Live
  • 2010 - John Cale & Band Live

Cun i Velvet Underground

Àlbum in studi

  • 1967 - The Velvet Underground and Nico
  • 1968 - White Light/White Heat

Culegamènt estéran