Il cigno dagli artigli di fuoco
|
C'l artìcul chè 'l è scrit in
Miranduléś |
 Inspektor Perrak greift ein
| ||
| Il cigno dagli artigli di fuoco | ||
 La Judy Winter in na figùra dal film | ||
| Al sign da 'l grinfi 'd fōg 1970 | ||
|---|---|---|
| Regìa: Alfred Vohrer | ||
| Scritōr: Manfred Purzer | ||
| Atōr: Horst Tappert • Werner Peters • Wolf Roth Hubert Suschka • Walter Richter • Judy Winter | ||
| Müsica: Rolf Kühn • José Padilla | ||
| Léngua: Tedésc • Ingléś • Rus • Francéś | ||
| Dürä dal film: 92 minüt | ||
| Nasiōṅ: Germàgna Òvest | ||
Il cigno dagli artigli di fuoco (Al sign da 'l grinfi 'd fōg) 'l è 'n thriller tedésc dal 1970 'd Alfred Vohrer girâ a Ambûrg e in dla Sasògna Basa.
Sunt
Méntar 'l è drē a ravanàr quèl in dla masa dla sità 'd Ambûrg, al barbòṅ Ede (Walter Richter) al cata 'l cadàvar 'd un travestî ad vint an, Toni. Dòp avēr-ag purtâ via la burséta e i sò buclèṅ, al piucióś al ciàma la pulisìa. Al cumisàri Perrak (Horst Tappert), ch'insém a sò fiōl Joschi (Georg M. Fischer) al s éra péna litgâ par na questiòṅ ad parchéǵ c'n un diretōr generàł pîṅ ad bèsi ciamâ Friedrich Imhoff (Hans Schellbach), al taca a indagàr in dal gir di buśòṅ ch'i faṅ di spetàcui vistî da dóna.
'L óm al mét sóta interugatòri soquànt trans culéga dla vitma, al chéchi Kosy (Ramonita Vargas) e Pinky (Angie Stardust), e 'l vîṅ a savēr ch'l invertî 'l éra ric sfundâ dabòṅ dònca 'l pulisiòt 'l è sicûr ch'l è stâ cupâ parchè 'l éra drē a ricatàr un pès grôs. Ad cl'idéa lè 'l è anc al malavitóś Karl Kaminski (Hubert Suschka), òṅ ch'l à vèrt n'aśiénda 'd fèr-vèć par quaciàr i sò tràfic ad dròga, ch'al vrév cuntinuàr lò al ricàt par titàr un muć ad bèsi. Jutâ p'r al fradèl dla vitma, Nick (Wolf Roth), e p'r un négar imigrâ sénsa parmés e dònca dasfrutâ in tut, batśâ da lò Bimbo (Gilbert-André Ehoulan), chi lò al próa a far-as dir al nóm misterióś da l’Emma Kastelbauer (Judy Winter), na dóna ch'l'iva vèrt un caśèṅ tulénd in afìt 'n edifìsi, che tut i cardìvan ch'al fus un cunvènt ad sōri, da 'l asicuradōr Heinz-Fritz Bottke (Werner Peters). In cal pòst lè, in du a gh lauràva anc Toni, a gh'éra 'n gir ad V.I.P. dla finànsa e dla pulìtiga visióś e purcùs, dònca 'l éra fàcil tiràr-i śò par pò ricatàr-i.