Hardcore (film 1979)
|
C'l artìcul chè 'l è scrit in
Miranduléś |
 Hardcore
| ||
.png) George C. Scott in na figùra dal film | ||
| Pòran 1979 | ||
|---|---|---|
| Regìa: Paul Schrader | ||
| Scritōr: Paul Schrader | ||
| Atōr: George C. Scott • Peter Boyle • Larry Block Season Hubley • Ilah Davis • Dave Nichols Gary Graham • Marc Alaimo • Leslie Ackerman Dick Sargent • Leonard Gaines • Hal Williams | ||
| Müsica: Jack Nitzsche | ||
| Léngua: Ingléś • Spagnōl | ||
| Dürä dal film: 108 minüt | ||
| Nasiōṅ: Stat Unî | ||
Hardcore (Pòran) 'l è 'n film dramàtic americàṅ dal 1979 scrit e dirèt par Paul Schrader.
La part dal prutagunìsta, pò andàda a George C. Scott, l'éra stada śibìda prima a Warren Beatty che però 'l à dit ad nò parchè al vliva 'n àtar regìsta e di cambiamènt in dla senegiadùra.
Sunt
Jake Van Dorn (George C. Scott) 'l è 'n industriàł ch'al fà i mòbii, pîṅ 'd bèsi e cristiàṅ calvinìsta sfegatâ tant che sò mujēr la 'l à lasâ. Al viṿ da par lò in Mìchigan insém a sò fiōla, na ragàsa ciamàda Kristen (Ilah Davis), ch'a pâr ch'l'àppia di idéi cunservadōri cuma lò.
Un dè la śōvna la partìs p'r un cunvégn religióś a Bellflower in Califàrgna ma, na vòlta rivàda là, la sparìs. Jake, dimóndi in pinsēr, par catàr-la al dmanda ajùt a 'n investigadōr privâ, Andy Mast (Peter Boyle), ch'al l'arcgnós in dla prutagunìsta dna pelìcula pòran da quàtar sòld in du la s fà dar da dū óm.
Sicûr che sò fiōla la sia stada custréta a giràr cal film lè malnét, Jack al partìs p'r al Golden State par purtàr-l' a cà mo la ragàsa la n s cata da gnanc na banda. Sò pàd'r al decìd dònca 'd métar 'n anùnsi su 'n giurnàł faghénd finta 'd ès'r un prudutōr ad pelìculi hardcore ch'al pésca di atōr. A i pruvèṅ a riva anc Jism Jim (Will Walker), òṅ di dū masć dal film cun sò fiōla. Quànd Jack al 'l arcgnós, al taca a far-ag dal dmandi e 'l atōr al gh diś 'd andàr a sintìr da na sèrta Niki (Season Hubley).
La dóna, in dal gir anc lē, la partìs cun Jack vèrs San Diego parchè a gh'è 'l caś che la Kristen la sia impgnàda in na prudusiòṅ in Mèsic e ch'la sia finìda in dla réda 'd Ratan (Marc Alaimo), un tisi dimóndi periculóś parchè al lavóra in di ambînt di film snuff.