George Michael

 Miranduléś

C'l artìcul chè 'l è scrit in Miranduléś

«

Last Christmas I gave you my heart but the very next day you gave it away, this year to save me from tears, I'll give it to someone special, once bitten and twice shy, I keep my distance but you still catch my eye, tell me baby, do you recognize me? well, it's been a year, it doesn't surprise me.»

(EN)(Last Christmas, 1984)

«

Al Nadâł pasâ a t ò dâ 'l mè cōr ma subìt al dè dòp at 'l à butâ via, 'st an par salvàr-um da 'l làgarmi, a 'l darò a 'n qualchidòṅ speciàł dabòṅ, na vòlta a gh casc ma dū nò, a t stag luntàṅ ma tè ta m ciàp incóra n'uciàda, dì'm teśôr, m arcgnós-at? bòṅ, 'l è pasâ 'n an, a n m surprénd minga.»

(MUD)

George Michael tòlt śò in dal 2006

Michael durànt al Faith World Tour dal 1988

Da 'l viṿ durànt un sò cuncèrt sinfònig

Georgios Kyriacos Panayiotou, cgnusû méj c'n al nóm 'd art ad George Michael (Lóndra, 25 ad Śugn dal 1963 – Goring-on-Thames, 25 ad Dicémbar dal 2016), 'l è stâ 'n cantànt e cumpuśidōr pop e soul ingléś cun 'n inìsi 'd caréra in dal grup di Wham! insém a 'l sò amìg chitarìsta Andrew Ridgeley.

C'n i sò sènt migliòṅ ad disc vindû 'l è òṅ di artìsta muśicài britànic più famóś in dal Régn Unî e anc a 'l èstar cuma in di Stat Unî in dū 'l gh'à un migliòṅ e pasa 'd sustenidōr. Dòp tri disc c'n i Wham! al s è butâ in na caréra da par lò dimóndi furtunàda tacànd c'n al disc Faith dal 1987 ch'al gh'à purtâ dū Grammy Award e vint migliòṅ e pasa 'd còpi vindùdi in tut al mónd.

Al gh'à abû di prubléma cun la sò cà discugràfica, la Sony, c'n al sò secónd disc Listen Without Prejudice Vol. 1 in du 'l vliva far dascórar sōl la sò mùśica e minga cumparìr faghénd la part dal sex symbol. Dòp al madûr Older al s è farmâ par soquànt tèmp dòp ès'r-as separâ da la sò cà discugràfica e 'l à fat vgnir fóra sōl di lavōr da 'l viṿ (Five Live cun dènt'r i pès sunâ a 'l cuncèrt tribùt par Freddie Mercury Somebody to Love e These Are the Days of Our Lives cantâ cun la Lisa Stansfield) e 'n disc ad còver (Songs from the Last Century).

In séguit al gh'à abû di prubléma anc persunài dòp èsar stâ arestâ 'l 7 'd Avrìl dal 1998 p'r èsar stâ bcâ a tintàr ad far sès c'n un pulisiòt in burghéś in un un cès pùblic a Los Angeles. In tut al manéri a vîṅ fóra na racòlta ciamàda Ladies & Gentlemen - The Best of George Michael ad sucès (quàtar disc ad plàtin in Itàglia).

Al 6 ad Śugn dal 2000 'l à tòlt part a 'l Pavarotti and Friends a 'l Parc Novi Sad ad Mòdna cantànd Brother can you spame a dime? e Don't let the sun go down on me insém a Luciano Pavarotti. I sò ùltim disc prima 'd murìr i èṅ Patience dal 2004 e Symphonica (2014).

Fra i sò pès più famóś a gh'è d'arcurdàr Careless Whisper, I Want Your Sex, Faith, Freedom! '90, Don't Let the Sun Go Down on Me (duét cun Elton John), Killer / Papa was a rollin' stone, Jesus to a Child, Fastlove, Spinning the Wheel, Outside, As, Freeek!, Shoot the Dog (in du 'l dà adòs a Tony Blair batśâ cuma 'l cagnulèṅ ad George W. Bush), Amazing, Flawless (Go to the City) e An Easier Affair ma specialmènt al braṅ scrit a i tèmp di Wham! Last Christmas ch'l è dvintâ 'n clàsic dal canti 'd Nadâł e pès ad sucès cuma c'l àtar sìngul Wake Me Up Before You Go-Go.

Discugrafìa

da par lò

Àlbum in studi

• 1987 - Faith
• 1990 - Listen Without Prejudice Vol. 1
• 1996 - Older
• 1999 - Songs from the Last Century (disc ad còver)
• 2004 - Patience

Da 'l Viṿ

• 1993 - Five Live (EP)
• 1997 - MTV Unplugged
• 2014 - Symphonica

Racòlti

• 1998 - Ladies & Gentlemen - The Best of George Michael
• 2006 - Twenty Five

c'n i Wham!

Àlbum in studi

• 1983 - Fantastic
• 1984 - Make It Big
• 1986 - Music from the Edge of Heaven

Racòlti

• 1986 - The Final
• 1997 - If You Were There (The Best of Wham!)

Culegamènt estéran

• (EN) Al sò sit ufisiàł

Nòti