Furmain

Da Wikipedia.
Jump to navigation Jump to search

C'l artìcul chè 'l è scrit in Piasintëin Emiliàn


In dialët piaṡintëin a s' ciama furmain un tipu ad furmäi italian fat cul lat ad vaca intreg che in italian a l'é inveci stracchino. A gh'é mia da scunfondal cun un ätar furmäi emilian dil pruvinci ad Pärma, Rëṡ, Modna e Bulogna (ma ch' il la fan anca in pruvincia ad Mantua, in Lumbardia) ch' al sa ciama propri furmain.

Al furmain in talian al sa ciama stracchino e in lumbärd strachin o strachì parché una vota il la fävan cun 'l lat dil vac chi ävan fat ca vegn indré dai prä in muntagna, donca i dṡivan ca il vac a i eran strac p'r al viaṡ. A i en cunsiderä furmain (o stracchini) di furmäi tant cmé la crescenza, al taleg', la ribiöla ad vaca e anca, par forsa, cul ch' i piaṡintëin i ciaman strachëin e che in italian a l'é inveci Gorgonzola (strachëin ad Gurgunṡöla).

Al sa cunusa cmé un furmäi a pasta mola, poc stagiunä, gras e cremuṡ, bianc, daspës cun la crusta sutila e tënra. Tipic ad la Lumbardia, al dé d'incö il la fan anca in Tuscana.