Frutarōla
|
C'l artìcol chè 'l è scrit in
Carpśàn |
La Frutarōla 'l è 'n quèder a òli su tela, piturê dal Vinsàins Campi vers al 1580 drē a la cumisiòun dal bancàri Hans Fugger per la sèla da diśnèr dal só castêl ed Kirchheim. Adèsi cla pitùra chè la s cata in dla Pinacutéca ed Brera a Milàṅ.
Descrisiòun
Al quèder 'l è lèreg 145x215 cm, c'n un paeśàģ apèina imbrumê e stiliśê in dal fonda, mèinter che in dal prìm piàṅ la frutaróla la fà vèder tuta na spianèda dla só fruta a nuèter ch'a la guardòm, intànt ch'la tin in màṅ un grâp 'd ùa negra. Al sogêt al precòr un pôc i tèimp che 'n pò più in là a s piturarà tanti natùri morti, e al tōś eśèimpi da soquànti pitùri di fiamìng Joachim Beuckelaer e Aertesen.