Frōda

Da Wikipedia.
C'l artìcul chè 'l è scrit in Carpśàn Emiliàn
Na giaca spurtìva col dedàinter un pò cuacê cun dla frōda in del spali e in di fiànc.
La frōda 'd pelìsa dàint'r a 'l capôt dal cantànt rùs Feodor Chaliapin, artrât in dal 1921 dal pitōr Boris Kustodiev.
Na frudèta stampèda a quadrôt ch'la cuàcia un cusèin ortopèdic.
Un pèra ed stivalèt col dedàinter frudê a culōr vîv.


La frōda (fodera in itagliàn) l'è 'n arvestimèint ed stófa, più o meno sustgnùda, ch'la cuacia soquànti tapisrìi, c'm'al stramâs e i cusèin, al divàṅ e 'l pultròuni, o anca la 'rvestìs al dedàinter ed soquànt vistî, c'm'a s pōl catèr a 'l intèren ed serti brèghi, 'd serti vésti e in dal giachi, per dèr-egh più 'd elegànsa e cuacèr méj el cuśdùri che 'ltrimèinti i se v'drèven in dl arvèrs.

El frōdi di vistî

El frōdi i vinen cuśìdi a 'l arvèrsa 'd soquànt vistî, sia per fèr-i bliśghèr méj atâc a 'l corp e sia per tgnìr-egh più 'd cheld. I pólen ès'r ed séda, cupri, polièster, poliamìda, viscóśa, lana, e cutòun felpê.
In dal dedàint'r ed soquànt vistî a s cata anc dal frōdi ch'i gh'àpien da tgnìr dimòndi cheld, c'ma in di capôt e giubôt per 'l invèren, p'r i paéś dal Nord, e alóra el frōdi i s'ràn ed pēl, ed pelìsa, finta e vera. El frōdi i s caten anch in dal dedànter ed soquànt stivàj, 'd schèrpi 'd lùs, ed borsi per sgnōra, ed valìśi e via descurènd.

El frōdi dal tapisrìi

El frōdi di stramâs e di divàṅ egl'ìn sovertùt fati ind un tisû sustgnû, méj s'l è 'd cutòun, ad armadùra uvrèda, e ch'i gh'pósen èser cuśìdi adôs o ès'r-egh sulèdi atâc cun dal sernéri, di ptòun, e anc dal velcher.

Manéri 'd dìr

  • (EGL) Sfrùcia bèin cla frudèta atâc a 'l cusèin! (IT) Infila orsù, la federa sul cuscino!

Vóś lighèdi

Èter progêt

Colegamèint estèren