Formula per un delitto

Da Wikipedia.

C'l artìcul chè 'l è scrit in Miranduléś Emiliàn

Murder by Numbers
Formula per un delitto

Chaplin e la Sandra Bullock in na figùra dal film
Fórmula p'r un delìt
2002
Regìa: Barbet Schroeder
Scritōr: Tony Gayton
Atōr: Sandra BullockBen ChaplinMichael Pitt
Ryan GoslingAgnes BrucknerChris Penn
Müsica: Clint Mansell
Léngua: Ingléś
Dürä dal film: 115 minüt
Nasiōṅ: Stat Unî


«
Al sōl difèt in dal piàṅ lōr l'éra lē.»
(Tagline dal film)


Formula per un delitto (Fórmula p'r un delìt) 'l è 'n thriller americàṅ dal 2002 ad Barbet Schroeder ch'al tōś ispirasiòṅ, acsè cuma 'l pelìculi Nodo alla gola e Frenesia del delitto, da 'n fat ad crònaca négra sucès dabòṅ, al masamènt 'd un putèṅ fat in dal 1924 par Nathan Freudenthal Leopold Jr. e Richard A. Loeb, dū śóvan fnòć ch'i stàv'n insém. Chi lōr dū i 'l ìvan fat sōl p'r al gust ad far-al, sarnénd la vitma a caś.

Al film, preśentâ fóra cuncōrs a 'l 55śum Fèstival ad Cannes, 'l à fat sù da piò ad sinquànta-siē migliòṅ ad dòlar dòp ès'r-an custâ sinquànta.

Sunt

Justin Pendleton (Michael Pitt) e Richard Haywood (Ryan Gosling) i èṅ dū studènt śōvan dimóndi amìg a 'l ùlt'm an dal culéǵ. Al prim 'l è piutòst un sulitàri, fiōl ad genitōr separâ, ch'a gh piàś dimóndi la filuśufìa 'd Friedrich Nietzsche, al secónd 'l è 'n visiâ śgarbâ e pîṅ 'd bèsi ch'a gh cata gust in dal cmandàr-al. Un dè i decìd'n ad cupàr na dóna sarnìda a caś, l’Olivia Lake (Krista Carpenter), sōl p'r al gust ad far-al, par far védar ch'i èṅ ad sōvra da 'l règhli e da la léǵ e p'r infnuciàr la pulisìa cun dal próvi falsi stramnàdi in gir p'r inciuldàr a 'l sò pòst un bidèl ch'al vindìva dla dròga a scōla, Ray Feathers (Chris Penn).

A indagàr su 'l caś l'è numinàda l'agìnta Cassie Mayweather (Sandra Bullock), na dóna che da ragàsa l'éra andàda in a risć 'd èsar vitma a sò vòlta 'd un femnisìdi. In dgl'indàśin la s fà jutàr par 'l investigadōr Sam Kennedy (Ben Chaplin), 'n óm ch'la s pòrta anc a lèt ma che pò al para via par via di sò prubléma cun chi masć ch'la gh'à 'd in alóra.

Quànd Richard al spara a Ray par far créd'r a tut ch'al s sia tòlt la vita par la vargóggna dal delìt, la pulisìa e Sam i èṅ sicûr 'd avér risòlt al caś ma la Cassie la sènt ch'a gh'è quèl ch'a traśa e la spedìs a analiśàr a sò spéśi dal gòmit catâ par tèra in dal sit in du 'l è stâ lasâ 'l cadàvar vgnénd acsè a savēr ch'l è 'd Justin.

Culegamènt estéran