Flavia Vento
|
C'l artìcul chè 'l è scrit in
Miranduléś |
Flavia Vento (Róma, 17 'd Avrìl dal 1977) l'è na mudèla dla reclàm, atōra, cantànta e showgirl itagliàna.
Biugrafìa
Flavia Vento la nas da na màdar ulandéśa e pàdar itagliàṅ. Dòp avér ciapâ al diplòma in lìngui, la taca a lauràr cuma mudèla a Milàn e a Parìś.
La sò caréra la partìs cun dal reclàm: in dal 1994 cun quéla dla Ferrero Rocher e in dal 1995 cun quéla dla Neutro Roberts. In séguit la s impéggna anc par la Lavazza in dal 1999 insém a Tullio Solenghi e par 'l Enel in dal 2000 insém a l'Alessia Merz.
In televiśiòṅ la fà la Dèa dla Furtùna in dal prugràma Il Lotto alle Otto e la baghéta sót al tàvul in Libero, na traśmisiòṅ ad schèrs telefònic ad Teo Mammuccari.
In chi an lè la fà un calendàri cavàda śò p'r al mensìl Boss e un servìsi par Playboy.
In dl'Istâ dal 2001 la rècita a teàtar Gli uccelli 'd Aristofane, insém a Franco Oppini e Ninì Salerno. Par Rai 2 la cundùś Stracult e l'è la prutagunìsta dal vìddeo Il Mambo Del Giubileo 'd Er Piotta.
La taca anc a recitàr: in dal 2002 in dla fiction ad Rai 2 Cinecittà cun Barbara De Rossi e in dal 2003 in dal film Andata e ritorno 'd Alessandro Paci. L'incìd anc un sìngul, Moreno.
In dal 2004 la s davśina a la pulìtica. Dòp avér dit ch'la gh'à la Margherita in simpatìa, la dà pò al sò apòǵ a Francesco Storace in di elesiòṅ dal Lâzi, curénd p'r al Partî liberàl Itagliàṅ. In òṅ di sò cumìsi, trasmìs anc par Striscia la Notizia, la diś cal lavór chè: «E pò, uhm. Ca'l chè, mè a metrév la mè fàcia par d'ideài ch'i èṅ, pròpria acsè, la guèra». La ciàpa 27 vōt. In di méś sucesìṿ in dal sò blog la tóś dal puśisiòṅ in favór dal bèsti e p'r i caṅ in particulàr.
In dal 2006 la fà 'n àtar film, Parentesi tonde insém a Karim Capuano, Raffaella Lecciso, Antonio Zequila e Giucas Casella.
L'à partecipâ anc a dū reality show: La Fattoria in dal 2004 e l'Isola dei Famosi in dal 2008 e in dal 2012.
L'è stada tòlta dèntar a 'l scàndal ad Vallettopoli p'r un ricàt preśùnt in di cunfrònt dal capitàṅ dla Roma, Francesco Totti, ma la soubrette la casa via i acùśi[1].
In d'l Agóst dal 2012 la s arlìa in n'intervìsta fata a 't setimanàl "A" p'r al fat ch'la fà fadìga a lauràr in dal mónd dal spetàcul, dgénd ch'a i sò tèmp a gh'éra più selesiòṅ in televiśiòṅ[2].
Televiśiòṅ
- Libero 2000
- Stracult 2001/2002
- La fattoria 2004
- L'isola dei famosi 2008 e 2012
Cìnema
- 2003 - Andata e ritorno, regìa 'd Alessandro Paci
- 2006 - Parentesi tonde, regìa ad Michele Lunella
Culegamènt estéran
Nòti
- ↑ A n ò maj fat di ricàt a ninsòṅ corriere.it, 6 'd Avrìl dal 2007
- ↑ A i mè tèmp a gh'éra più selesiòṅ in televiśiòṅ Tgcom24.mediaset.it, 8 'd Agóst dal 2012