Final Destination

Da Wikipedia.

C'l artìcul chè 'l è scrit in Miranduléś Emiliàn

Final Destination
Final Destination

Na figùra dal film
Destinasiòṅ finàla
2000
Regìa: James Wong
Scritōr: Glen Morgan
Jeffrey Reddick • James Wong
Atōr: Devon SawaKerr SmithAli Larter
Seann William ScottRoger Guenveur Smith
Amanda DetmerDaniel RoebuckTony Todd
Kristen ClokeBrendan FehrChad Donella
Müsica: Shirley Walker
Léngua: IngléśFrancéś
Dürä dal film: 97 minüt
Nasiōṅ: Stat UnîCànada


«
Al tò destîṅ 'l è bèla sgnâ. Minga sfidàr la mòrt.»
(Tagline dal film)


Final Destination (Destinasiòṅ finàla) 'l è 'n film ad scarésa dal 2000 ad James Wong ch'al gh'à abû quàtar séguit: Final Destination 2 dal 2003, Final Destination 3 dal 2006, The Final Destination 3D dal 2009 e Final Destination 5 dal 2011.

'L à fat sù da piò ad sènt-dódas migliòṅ ad dòlar a frònt 'd un cóst ad vint-a-tri.

Sunt

Soquànt śuvnòt americàṅ i èṅ drē a tōr 'n aparéć a New York p'r un viàś sculàstic in Frància. I èṅ tut sù 'd gir a part Alex Browning (Devon Sawa) ch'l è dimóndi agitâ. Quànd 'l aparéć al s léva in vōl, i sedìi i sa squàsan p'r un pôc e pò a taca a tarmàr incòsa in fin tant ch'al sa sćiànca a tèra.

Alex al vèra i òć: par furtùna 'l è sōl 'n arbgàt. Ma pò chi lò al véd di quèi ch'al s éra insugnâ e al próa a scapàr via da 'd lè, pîṅ ad paùra. Qvéi dla sicurésa i al faṅ śmuntàr śò, insém a di sò cumpàgn c'n al diav'l adòs cuma lò e anc a 'n insgnànta ch'la gh'iva da tgnir-'g adrē.

In dla sala 'd aspèt a taca na litgàda par la vacànsa andàda in fum. Ma a 'ndàr in fum pò 'l è pròpria 'l aparéć ch'al ciàpa fōg in vōl prima dal stus finàl. Turnâ a cà, chi lōr i n pōlan far àtar che tōr part a i funerài di sò amìg.

Un méś dòp però a mōr òṅ di scampâ, Tod (Chad E. Donella), in dal bagn ad cà sua, strangulâ da na lasa. La mòrt la i vèṅ a catàr òṅ a drē a c'l àtar, dant vita a qvéla ch'a pâr na maledisiòṅ. La Terry (Amanda Detmer) la finìs sóta a 'n bus, la prufesōra Lewton (Kristen Cloke) la salta p'r ària insém a la sò cà dòp avér ciapâ adòs da tut cuma 'n pès ad vēdar e un curtèl.

Alex, cun 'l ajùt dla Clear (Ali Larter), n'atra scampàda par miràcul, al próa a 'ndàr-'g a fónd, tacànd da 'l sò insùni.

Culegamènt estéran