Fausto Gresini
|
C'l artìcul chè 'l è scrit in
Miranduléś |
Fausto Gresini (Iómmla, 23 ad Śnar dal 1961 - Bulógna, 23 ad Favràr dal 2021) 'l è stâ 'n dirigìnt spurtìṿ e curidōr ad mòti rumagnōl, campiòṅ dal mónd in dla clas 125 in dal 1985 e in dal 1987. In dla sò caréra 'l è stâ bòṅ ad vìnsar vint-i-òṅ gari su sènt-trentadū gran prèmi cûrs, cun quarantasèt pòdi e darsèt pole position.
Dòp ès'r-as ritirâ in dal 1994, 'l à mis in pē al team Gresini Racing faghénd-ag anc da manager. Cun la sò squàdra 'l à vins un tìtul in dla clas 250 c'n al giapunéś Daijirō Katō in dal 2001, 'n àtar cun Toni Elias in dla stagiòṅ 2010 in Mòta2 e un tèrs campiunâ in dal 2018 cun Jorge Martín in Mòta3.
'L à tòlt part da 'l 2002 a 'l 2020 anc a la MòtaGP, prima cun la Honda e pò cun l'Aprilia, faghénd cùrar Marco Simoncelli e miténd-'s in bisàca un secónd pòst cun Sete Gibernau in dal 2004 e cun Marco Melandri in dal 2005.
Dòp dū méś ad patimènt a 'l uśdàł, 'l è mòrt a ssant'an p'r al COVID-19 ch'al gh'iva ruinâ i palmòṅ. Al lasa sò mujēr, la Nadia, e quàtar fiōi, Lorenzo, Luca, l′Alice e l′Agnese.
Culegamènt estéran
- (IT) (EN) (ES) (DE) (FR) Template:Ja La sò paśna su 'l sit dla Dorna