Er Piotta

C'l artìcul chè 'l è scrit in Miranduléś

«

Poi me compro tutto quello che è coatto, lo studio cinquantaquattro o il piper disco, ma Amanda Lear è una femmina o un maschio? Piotta, merlo maschio come Lando, un urlo, un lampo, il cafone è sul palco, il supercafone eccolo qua, Piotta è il suo nome nun lo scordà, movi la mano de qua e de là, fammela vede nun te fermà.»

(IT)(Supercafone, 1999)

«

Pò a m còmpar tut quél ch'l è cuàt, al studi sinquanta-quàtar o al disco piper, ma l'Amanda Lear è-la na fémna o 'n masć? Piotta, mèral masć cuma Lando, un sîg, un lamp, al cafòṅ 'l è in sal palc, al supercafòṅ ca'l chè, Piotta 'l è al sò nóm briśa daśmindgàr-t-al, mōṿ la maṅ da 'd chè e da 'd là, fà-m-la védar, minga farmàr-at.»

(MUD)

Tommaso Zanello, in art Er Piotta (Róma, 26 'd Avrìl dal 1973), 'l è un cantànt rap itagliàṅ.

Biugrafìa

Tommaso Zanello, ad màdar milanéśa, al crés in dal quartér rumâṅ ad Montesacro cun al scutmàj ad Piotta par via di sò uciài tónd cuma dal munédi da sènt franc, diti in dal dialét rumanésc piotte. Da śóvan al stùddia a 'l licèo clàsic Giulio Cesare e pò al s fà i òs faghénd al DJ par dal ràddio rumàni, tacànd a scrìvar di tèst rap.

In séguit al lavóra cun di grup cuma Colle der Fomento e Ice One, miténd sù la Taverna VIII Colle Roma. Sèg al taca a far i sò prim braṅ underground par pò pasàr a la banda di Robba Coatta insém a MC Turi e al DJ Squarta di Cor Veleno.

In dal 1997 a vèṅ fóra al mixtape La banda der trucido e pò al canti Ciclico (Sìclic, par la culóna sunóra dal film Torino Boys dirèt p'r i Manetti Bros.) e Spingo io (A cuć mè).

In dal 1998 al vins al tìtul ad mijór MC itagliàṅ par la rivìsta AL Magazine e al vèṅ sarnî par la Antibemusic par far gnir fóra al sò prim disc Comunque vada sarà un successo (In tut al manéri al sarà un sucès) cun dèntar i sìngui Dimmi qual è il nome (Dì-'m qual è al nóm) e Supercafone (Supercafòṅ), ristampâ pò 'l an dòp cun la śònta ad soquànt braṅ. 'L è un sucès dabòṅ e Er Piotta al vins al disc ad plàtin.

In dal 2000 al fà gnir fóra Democrazia del microfono (Demucràsia dal micròfun) cun i braṅ ad punta La mossa del giaguaro (La mòsa dal giaguâr) insém a la Jenny B e Il mambo del Giubileo, druàda pò cuma sìggla dal prugràma televiśìṿ ad Raidue Stracult cun la Flavia Vento.

In dal 2001 al dà a la luś Eurocontanti mèntar in dal 2004 al và a Sanremo par cantàr Ladro di te (Làdar ad tè) e anc la canta 'd Adriano Celentano Chi non lavora non fa l'amore sunàda a la manéra rap.

Dal 2004 in avànti al pùblica i àlbum Tommaso (2004), Multi culti (2007) e S(u)ono diverso, śóg ad paròli fra A sòṅ difarènt e Sòṅ difarènt.

Discugrafìa

Àlbum

1998 - Comunque vada sarà un successo
1999 - Comunque vada sarà un successo '99
2000 - Democrazia del microfono
2002 - La grande onda
2004 - Tommaso
2007 - Multi culti
2009 - S(u)ono diverso

Culegamènt estéran