E ridendo l'uccise
|
C'l artìcul chè 'l è scrit in
Miranduléś |
 E ridendo l'uccise | ||
 Manlio Dovì in na figùra dal film | ||
| E ridénd al 'l à masâ 2005 | ||
|---|---|---|
| Regìa: Florestano Vancini | ||
| Scritōr: Florestano Vancini • Florestano Vancini | ||
| Atōr: Manlio Dovì • Sabrina Colle • Giorgio Lupano Ruben Rigillo • Marianna De Micheli • Vladimir Iori Vincenzo Bocciarelli • Fabio Sartor • Mariano Rigillo Fausto Russo Alesi • Enzo Robutti • Carlo Caprioli | ||
| Müsica: Ennio Morricone | ||
| Léngua: Itagliàṅ • Latìn • Emigliàṅ • Vènet | ||
| Dürä dal film: 121 minüt | ||
| Nasiōṅ: Itàglia | ||
E ridendo l'uccise (E ridénd al 'l à masâ) 'l è 'n film stòric, biugràfic e dramàtic dal 2005 ad Florestano Vancini, 'l ùltim girâ da 'l regìsta fraréś prima 'd murìr.
La pelìcula l'è stada giràda in di dintór'n ad Belgrâd.
Sunt
[mudéfica la surzéia]Taddeo Brugnola dit “Muschìṅ” (Manlio Dovì), amìg ad Ludovico Ariosto (Fausto Russo Alesi), al fà 'l bufòṅ a la cōrt di Èste, sgnōr ad Frara, Mòdna e Réś. Dòp la mòrt 'd Èrcule I 'd Èste, al ducâ esténs 'l éra pasâ a gl'inìsi dal XVI sécul a sò fiōl Fòns I 'd Èste (Ruben Rigillo), marè dla fiōla dal papa Lisàndar VI, la Lucrezia Borgia (Marianna De Micheli), e fradèl dal véscuv Ippolito 'd Èste (Vincenzo Bocciarelli), ad Giùli 'd Èste (Giorgio Lupano), nâ da sò pàdar fóra da 'l matrimòni, e 'd Ferànt 'd Èste (Carlo Caprioli), ch'al vliva dvintàr lò 'l duca.
Quànd Giùli al gh la cava, par via di sò bèi òć, a purtàr via la cuśìna dla Lucrezia, l’Angiola (Victoria Larchenko), a sò fradèl Ippolito, chi lò al s véndica faghénd-al dvintàr mèś òrub a fòrsa 'd far-ag dar di cōlp ad spada in dal grugn. Anc se Fòns al próa a métar paś fra i fardèi, Giùli e Ferànt i strùlg'n un piàṅ par far fóra 'l duca, cun 'l ajùt dal cònt ad San Ceśàri, Albertìṅ V Buschét (Mariano Rigillo), ch'l andàva in a risć ad pèrd'r al sò tèri, e dal capitàṅ De Roberti (Fabio Sartor). Al cònt al manda Muschìṅ da 'n mèdag dal sò bandi, Clodoveo al spesiàł (Enzo Robutti) dit “Spaca-budèl”, a tōr un bućtèṅ ad vlèṅ da druàr par cupàr Fòns. Lung la via Taddeo al salva la vita a 'n làd'r ad faśàṅ, Menato (Marko Petrović), e a sò mujēr, la Martina (Sabrina Colle), ma pò di delinquènt pîṅ ad fam i gh pòrtan via 'l sò cavàl e 'l bućtèṅ. Giùli al s arlìa dimóndi c'n al sò bufòṅ ma pò al prepàra na trapla par sò fradèl, un piaṅ par masàr-al méntar 'l è a lèt cun tri putàni venesiàni a cà dal cantànt ad cōrt, al castrâ Giancantōr (Vladimir Iori). Ma Ippolito, ch'l iva naśâ quèl, al gh la cava prima a far falìr al tragatèṅ e pò, dòp avēr turturâ Muschìṅ par far-as dir i nóm di cuspiradōr, al giustìsia in piàsa Buschét e 'l capitàṅ, srand a vita i sò dū fradèi traditōr in na tór.