Dixiecrat

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Grand eletōr “dixiecrat” (in aràns) ciapâ a gl'elesiòṅ dal ’48


Al Partî demucràtic p'r i dirìt di Stat (States' Rights Democratic Party in ingléś, ad sòlit ciamâ Dixiecrat, sincràśi ch'la mìsćia insém “Dixie” e “Demucràtic”) 'l è stâ 'n partî pulìtig di Stat Unî fundâ in dal 1948 a Birmingham (Alabàma) da na scavśadùra dal Partî Demucràtic in di stat Dixie dal sud.

Da cal bandi là i vlìv'n incóra tgnir-as strica la segregrasiòṅ rasiàla e 'l léǵ fati par Jim Crow e i n s cumpatìvan pròpria briśa che qvéi ad Washington i vgnìsan lè a mètar bèc in di sò fat parchè a cà sua i gh vlìvan cmandàr lōr e i vlìvan ch'in dgl'elesiòṅ i vutìsan sōl i biànc e ch'i nég'r i andìs'n in scōli lòfi sōl par lōr.

Dòp ch'in dla convention ad Filadèlfia dal Luj dal 1948 l'ala liberal dal partî, qvéla di stat dal nòrd, la gh l'à abùda vinsa in dal mét'r in dal prugràma un quàlc prugrès su i dirìt sivìl, i mémbar cunservadōr dal sud i aṅ śbatû la pòrta candidànd a presidènt òṅ di lōr, Strom Thurmond, guvernadōr dla Carulìna dal Sud e in séguit sò senadōr p'r un squantèran 'd an[1].

Inólt'r i Dixiecrat i fàvan fadìga a mandàr śò 'l fat che durànt la secónda guèra mundiàla dū migliòṅ ad nég'r i ìsan tacâ a sarvìr al paéś cuma suldâ ma specialmènt ch'i ciapìsan anc na paga cumpàgna a i biànc e i benefìsi di veteràṅ.

Nùm'r ad vòlti ch'i stat dal „Solid South“ i n aṅ mia vutâ p'r i demucràtic in dal 23 elesiòṅ presidensiàli da 'l 1876 a 'l 1964 - 'L Arkànsas al n 'l à mai fat, tant par dir
In aràns i stat cunquistâ p'r al dixiecrat Wallace

Dòp gl'elesiòṅ ad c'l an lè, vinsi p'r al candidâ demucràtic ufisiàł Harry S. Truman, i dixiecrat, ch'i èn però stâ bòṅ listés ad vìns'r in Missisìpi (87%), Alabàma (80%), Luiśiàna (49%) e Carulìna dal Sud (72%), i èṅ in gènar turnâ in dal Partî Demucràtic e i aṅ tacâ a tōr'n al cuntròl piàn piàṅ tant da fiacàr al blòc di stat sudìsta vèrs i candidâ presidènt demucràtic cgnusû cuma „Solid South“ (Sud Sòlid) par pò pasàr, baràca e buratèṅ, da la banda dal partî republicàṅ, specialmènt in di an Stanta dòp ch'in dal 1964 al presidènt Lyndon B. Johnson, demucràtic dal Tèxas ch'l éra andâ sù dòp al masamènt ad John Fitzgerald Kennedy, al s è parmìs ad firmàr la léǵ su i dirìt sivìl.

In séguit al guvernadōr dixiecrat d'l Alabàma George Wallace al decìd ad preśentàr-'s a gl'elesiòṅ dal 1968 a nóm dal „Partî Americàṅ Indipendènt“ (American Independent Party) parchè al saìva ch'al n sarév minga stâ bòṅ ad vìns'r al primàri demucràtichi. Faghénd da tèrs incòmad Wallace al vliva muciàr sù 'n quàlc vōt in dal sud par far in manéra che ninsòṅ di àtar dū candidâ, Richard Nixon p'r i republicàṅ e Hubert Humphrey p'r i demucràtic, al gh la cavìs a pasàr i 270 grand eletōr e dònca al fus pò custrét a mét'r-as 'd acòrd sèg. 'D atra part al blòc dla minurànsa sudìsta dal Partî Demucràtic 'l iva sèmpar mis i bastòṅ in dal rōdi a 'l pulìtichi prugresìsti a livèl federàł tant ch'i presidènt Franklin Delano Roosevelt, Harry S. Truman e John Fitzgerald Kennedy i èṅ sèmpar stâ custrét a far i cònt sèg[2]. Al sò piàṅ però 'sta vòlta 'l è andâ a gambi p'r ària parchè Nixon al 'n à fat sù listés 301 cónt'r i sò 46 ciapâ tut a Dixie Land e i 191 di demucràtic.

A 'l dè 'd incō la paròla dixiecrat l'è druàda p'r indicàr un demucràtic cunservadōr e pupulìsta dal sud anc s'adès a và fòrt dimóndi 'l acrònim DINO (“Democrat In Name Only” ch'a vōl dir “Demucràtic sōl in dal nóm”) o la definisiòṅ ad Fox News liberal, Fox Democrat e Fox News Democrat esénd ch'al canàł Fox News ad Rupert Murdoch 'l è dimóndi da la banda dal Tea Party[3].

Nòti

  1. La campàggna eleturàla dal 1948 Elezioni USA, 10 ad Favràr dal 2015
  2. Luiśiàna, la ròcafòrt demucràtica ch'la crōda Affari Internazionali, 11 ad Śnar dal 2015
  3. Murdoch, «vólp» dal Tea Party Il Sole 24 Ore, 24 ad Luj dal 2011