Contagion (film 1987)
|
C'l artìcul chè 'l è scrit in
Miranduléś |
 Contagion | ||
.png) La Deirdree Wallace in na figùra dal film | ||
| Cuntâǵ 1987 | ||
|---|---|---|
| Regìa: Karl Zwicky | ||
| Scritōr: Ken Methold | ||
| Atōr: John Doyle • Nicola Bartlett • Ray Barrett Nathalie Gaffney • Pamela Hawkesford • Chris Betts Jacqueline Brennan • Reg Cameron • Tracy Nugent Michael McCaffrey • Michael Simpson • Greg Powell | ||
| Müsica: Frank Strangio | ||
| Léngua: Ingléś | ||
| Dürä dal film: 95 minüt | ||
| Nasiōṅ: Austràglia | ||
Contagion (Cuntâǵ) 'l è 'n film ad scarésa dal 1987 ad Karl Zwicky fat c'n un budget stimâ ad setsènt-sinquantamìla dòlar austragliàṅ.
Al film 'l è stâ girâ a Brisbane, in dla regiòṅ dal Queensland, in trénta-sinc dè e 'l è cgnusû anc c'n al nóm ad West Coast Horror.
Sunt
[mudéfica la surzéia]Mark Clifton (John Doyle) al viṿ in Austràglia cun sò mujér, la Cheryl Davies (Nicola Bartlett). Ad mistēr al vénd dal cà, insém a i sò culéga Alec (Chris Betts) e Frank Hanes (Michael Simpson), par l'agensìa dal sò cap Henry (Reg Cameron). Méntar 'l è via par lavōr ad nòt, lung la via, al fà a mènt ch'e śò da la strada a gh'è na dóna in di guàj (Donna Jan Newby). Chi lē l'iva dmandâ 'n pasàǵ a 'n camiunìsta (Maurice Hugues) ma pò l'éra stada dascargàda śò parchè la n vliva minga far sès sèg ma l'éra finìda listés da la padèla a la braś parchè da 'l bòsc, tut 'd un trat, 'l éra saltâ fóra 'n redneck insiminî e mèrd, Bruce (Tracy Nugent), par viulentàr-la. Mark al salta śò da la màchina par jutàr-la ma 'l éra méj s'al s fus fat i cas suo parchè adès al gh'à da far-'s al cas ad Tony (Michael McCaffrey), un mat dit Psycho amìg ad Bruce e cun na balèstra in maṅ. Chi lò 'l al ciàpa e pò, cun na mascra da ninét adòs, al s 'l incùla. A far da magnàr a i dū imbambî a gh pènsa na dóna mata cumpàgna (Deirdree Wallace), daspatnàda e muśnènta ch'la fà scarésa. Mark al gh la cava a cupàr i dū óm e a scapàr via ma la dóna la n è minga acsè furtunàda, l'éra méj s'l'is fat al servìsi a 'l camiunìsta invéci 'd śmuntàr śò in na strada vōda in dal scûr da par lē, a gh vōl pròpria na deficènta sénsa critèri!
In dal sintēr lung i bòsc Mark al cata na dóna, la Cleo (Nathalie Gaffney) ch'la 'l ajùta purtànd-'l in dla sò vila in du i vìv'n anc un vèć, Roderick Bael (Ray Barrett), e n'atra biónda, l’Helen (Pamela Hawkesford). Chi lōr i èṅ dvintâ migliardàri faghénd dal speculasiòṅ su di “futures” in bórsa. Prima ch'al vaga via l’Helen la s fà prumétar ch'al turnarà un dè, in cambi al gh'arà bèsi e sès, ma biśógna ch'al dvégna anc catìṿ cupànd tut qvéi ch'i s mitràṅ in mèś.
Mark al la tōś in paròla cupànd prima Frank c'n un pēś dla palèstra e pò Henry śland-ag la ghigna. In séguit al tórna in dla vila purtànd-'s adrē i bèsi dal librét ad rispàrmi ch'l à fargâ da la burséta 'd sò mujér che, fra 'l àtar, 'l à anc pruâ a masàr. Quànd la Cheryl la 'l và a pascàr in di bòsc druànd 'n aparéć par guardàr ad sóta 'l al bèca in un prâ balàr da par lò mént'r a Mark a gh parìva 'd èsar fra i bras dla Cleo. Mark al n in vōl più savēr dla Cheryl e al s mét in tèsta 'd andàr a vìv'r in dla vila purtànd-'s adrē na ragàsa inamuràda 'd lò, la Trish (Jacqueline Brennan), ma che lò al vōl śibìr invéci a Roderick. Mo cum è-la che a i òć dla Trish la vila l'è sōl na cà 'd légn in ruìna, tuta tarulìda?