Cimitero vivente
|
C'l artìcul chè 'l è scrit in
Miranduléś |
 Pet Sematary
| ||
| Cimitero vivente | ||
 Dale Midkiff e 'l gat Church in na figùra dal film | ||
| Simitèri vivènt 1989 | ||
|---|---|---|
| Regìa: Mary Lambert | ||
| Scritōr: Stephen King | ||
| Atōr: Dale Midkiff • Fred Gwynne • Denise Crosby Brad Greenquist • Michael Lombard • Miko Hughes | ||
| Müsica: Elliot Goldenthal | ||
| Léngua: Ingléś | ||
| Dürä dal film: 102 minüt | ||
| Nasiōṅ: Stat Unî | ||
Cimitero vivente (Simitèri vivènt) 'l è 'n film ad scarésa americàṅ dal 1989 dla Mary Lambert trat da 'l rumànś umònim ad Stephen King. 'L à fat sù da piò ad sinquànta-sèt migliòṅ ad dòlar esénd-an custâ sōl ùnd'ś e mèś. Al gh'à abû un séguit in dal 1992, Cimitero vivente 2.
Al “Pet” dal tìtul uriginàł (Pet Sematary) 'l è 'n fals amìg d'l emigliàn parchè a n vōl mia dir pèt e gnanc pét ma al fà riferimènt a 'l bèsti ch'i vìv'n insém a 'l óm, dònca “Simitèri dal Bèsti dumèstichi”.
In dla culòna sunóra dal film i gh'ènan dū braṅ dal grup di Ramones: Sheena Is a Punk Rocker e Pet Sematary, scrita apòsta p'r al film. In dal 2015 in Flòrida 'l è sucès un fat ch'l arcòrda dimóndi cal film chè: un gat cardû mòrt ciamâ Bart dòp èsar stâ saplî 'l è turnâ a cà da 'l sò padròṅ sinc dè dòp[1].
Sunt
A 'l mèdag Louis Creed (Dale Midkiff) a gh vèṅ dâ 'l incàrag ad far servìsi in na scōla dal Maine. Insém a sò mujér Rachel (Denise Crosby) e a i sò fiōi Gage (Miko Hughes) e l’Ellie (Blaze Berdahl) al spatìna a Ludlow in dua 'l à cumprâ na vila. Lè al dvènta amìg dal sò vśèṅ ad cà, Jud Crandall (Fred Gwynne), ch'al gh diś ad star atènt a la strada lè darènt in dua i viàśan a tuta bira di càmion sénsa critèri. Difàti al prim dè ad lavōr Louis al gh'à subìt da dar ajùt a 'n śōvan finî sóta a na màchina, Victor Pascow (Brad Greenquist), ch'al gh'à 'l crani mèś avèrt. Prima 'd murìr chi lò al gh diś che 'l cōr 'd 'l óm 'l è più dûr dna préda e che prèst al turnarà da lò.
Cla nòt lè Louis al gh'à 'n arbgàt in dua al fantàsma ad Pascow al gh diś 'd andàr sèg a 'l simitèri dal bèsti ch'a gh'è lè dintóran. 'L óm al partìs subìt e al riva a 'l campsànt in dua Pascow al gh fà védar na mùcia 'd légn e al gh cònta 'd a n pasàr mai cal ségn parchè 'l è na baréra ch'la divìd al mónd di viṿ da 'l mónd di mòrt. Louis al s déśda in dal sò lèt ma a i pē al gh'à dla tèra adòs.
Un dè Church, al gat dl’Ellie, al finìs spaplâ sóta 'n càmion. La putìna la n è minga in cà e sò pàdar al n vōl minga dir-ag qvél ch'è sucès. Judd al gh cunsìlia 'd andàr a saplìr-al in un simitèri indiàṅ dla tribù di Micmac ma par far-al i gh'aṅ da pasàr la mùcia 'd légn che Pascow al gh'iva fat védar. Louis al và óltar e al scava la fòsa a 'l gat. Al dè dòp Church, tut muśnènt e cun dal fridi adòs, al tórna a cà. Louis al dmanda spiegasiòṅ a Judd e 'l vèć al gh diś ch'al simitèri in dua i ìvan saplî la bèstia al gh'à 'l putēr ad far turnàr in vita i cadàvar.
Culegamènt estéran
Nòti
- ↑ Bart, al "gat śómbi": saplî, dòp sinc dè al tórn' in vita ilgazzettino.it, 30 ad Śnar dal 2015