Chris Christie

Da Wikipedia.
C'l artìcul chè 'l è scrit in Miranduléś Emiliàn
Christie tòlt śò in dal 2015


Christopher James Christie, cgnusû méj cuma Chris Christie (Newark, 6 ad Setémbar dal 1962), 'l è 'n pulìtic americàṅ, 55śum guvernadōr dal stat dal New Jersey.

'L è mémbar dal partî republicàṅ e 'l tîṅ adrē a dal puśisiòṅ ad sèntar. 'L è spuśâ cun la Mary Pat Foste e 'l gh'à quàtar fiōi.

Biugrafìa

Fiōl dna dóna cun di urìgini sicigliàni, la Sondra A. Grasso, e 'd un reviśōr di cònt cun di urìgini scuséśi, Wilbur James Christie dit Bill, Chris da śōv'n al stùdia léǵ a la Seton Hall University par pò dvintàr avucàt 'd mistēr.

Dòp èsar-'s davśinâ a la pulìtica, in dal 2009 al cur par dvintàr guvernadōr dal New Jersey p'r al partî republicàṅ e al gh la cava a bàt'r al demucràtic Jon Corzine c'n al 49% di vōt cónt'r al 45% dal sò rivàł. In dal 2012 al vîṅ cunfirmâ a la sò carga baténd la senadōra demucràtica Barbara Buono.

In dal 2014 'l è finî in mèś a dū scàndai, al „Bridgegate“ (di sò culaburadōr i ìvan fat in manéra ch'i culegamènt cun la sità 'd New York i fùsan sarâ par generàr di ingōrg spavintóś ad màchini par far-'g-la pagàr a 'l sìndig demucràtic 'd Fort Lee) e 'l „Sandygate“ (Christie 'l iva druâ i bèsi federài p'r al vitmi d'l uragàṅ Sandy par far di “spot” anc eleturài).

Al presidènt Obama e 'l guvernadōr Christie i dascóran c'n al vitmi d'l uragàṅ Sandy
Chris in dal 2011

In dal 2015 al decìd ad cùrar par dvintàr al candidâ republicàṅ a gl'elesiòṅ presidensiàli dal 2016 anc se soquànt cumentadōr i gh'ìvan di dubi ch'un budlòṅ cuma lò al psis cavàr-'g-la par via dal sò péś ad sènt-sinquànta chilo[1]. In dal sò prugràma al vliva tgnir trasa di migrànt cum a s fà c'n i pac[2] ma a s véd subìt ch'in dal primàri dal sò partî al fà fadìga a ciapàr di delegâ. Al 7 ad Favràr dal 2016, dòp 'n àtar riśultâ lòfi in dal New Hampshire, al gh dà a muć ma prima 'l dà a surpréśa 'l sò apòǵ a Donald Trump invéci che a c'l àtar muderâ in camp, al senadōr dal Tea Party dla Flòrida Marco Rubio.

In dl'Istâ dal 2017 'l è stâ bcâ a ciapàr al Sōl cun la sò famìja a 'l Island Beach State Park méntar gl'abitànt dal sò stat i n psìvan minga andàr a 'l mâr par via dal blòc di lavōr aministratìṿ fat da lò parchè al n s mitìva minga 'd acòrd c'n i demucràtic. In un prim mumènt Christie al s è diféś dgénd ch'a n éra briśa véra ma quànd i èṅ saltàdi fóra 'l foto ch'i 'l inciuldàvan, al sò purtavóś al 'l à diféś dgénd che «al n à minga ciapâ 'l Sōl parchè al gh'iva 'n brét da baseball in cô». A la dmanda 'd un giurnalìsta ch'al vliva savēr s'a gh parìva curèt druàr na spiàgia saràda a tut a part lò, Christie 'l à rispòst malmustóś «Curî a la carga 'd guvernadōr e a prî avēr anc vò na residénsa lè»[3].

Tgnéd adrē a 'n sundàǵ dl'Università 'd Quinnipiac, Chris 'l è 'l guvernadōr americàṅ c'n al tas ad gradimènt più bas ad tut, al 15% a 'l incìrca[4].

Culegamènt estéran

Nòti