Capricorn One

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Capricorn One
Capricorn One.png
Sam Waterston in na figùra dal film
Capricór'n Òṅ
1977
Regìa: Peter Hyams
Scritōr: Peter Hyams
Atōr: Elliott GouldJames BrolinO.J. Simpson
Sam WaterstonBrenda VaccaroHal Holbrook
Karen BlackTelly SavalasDavid Huddleston
David DoyleDenise NicholasRobert Walden
Müsica: Jerry Goldsmith
Léngua: Ingléś
Dürä dal film: 123 minüt
Nasiōṅ: Stat UnîRégn Unî


«
Sarév-at sóta shock s'at saìs ch'al mumènt più bèl dla nòstra stòria 'd adès al prév mai èsar sucès dabòṅ?»
(Tagline dal film)


Capricorn One (Capricór'n Òṅ) 'l è 'n film dramàtic americàṅ e britànic dal 1977 scrit e dirèt par Peter Hyams, baśâ su la teurìa dla cuspirasiòṅ, dimóndi fòrta in di an Stanta, ch'la misiòṅ d'l Apól 11 su 'l prim śbarc d'l óm su la Luna al sia stâ 'n cumplòt dla NASA p'r infnuciàr la gint.

La pelìcula l'è custàda sinc migliòṅ ad dòlar e in dal dupiàǵ itagliàṅ la fà riferimènt a 'n prugràma dla televiśiòṅ itagliàna di an Ssanta ad candid camera, Specchio segreto ad Nanni Loy, quànd òṅ di astrunàuta al n capìs minga cuś 'l è drē a sucéd'r e al s aspèta ch'i gh dìgan ch'l è tut un schèrs mo invéci nò.

Sunt

Dòp quìnd'ś an ad preparasiòṅ e dimóndi bèsi spēś, la NASA l'è prònta a far un viàś spasiàł par métar pē su Mart dòp èsar bèla stada su la Luna. Al guèr'n americàṅ però al n vōl minga métar-'g la fàcia, magàri dòp in dal caś, parchè al gh'à paùra che quèl a pòsa 'ndàr stòrt e 'l Cungrès al n aspèta àtar par tajàr i finansiamènt. Al presidènt di Stat Unî (Norman Bartold) al preferìs acsè armàgn'r a la Cà Biànca e mandàr a Houston al sò vice Price (James Karen), un tisi piutòst malmustóś c'n al respunsàbil dla misiòṅ “Capricorn One”, al dutōr James Kelloway (Hal Holbrook). Chi lò, fra 'l àtar, 'l è in pinsēr parchè al sà ch'al raś al prév avēr-'g un difèt esénd che l'aśiénda ch'la gh'à vindû di cumpunènt la i à fat in ecunumìa par guadàgnàr-ag da piò.

Quànd tut 'l è prònt, a vîṅ urdnâ a i tri austràuta, al culunèl Charles Brubaker (James Brolin), al tenènt culunèl Peter Willis (Sam Waterston) e a 'l cmandànt John Walker (O.J. Simpson), ad śmuntàr śò ad nascòst in présia e 'd lugàr-'s in un sit segrét minga tant luntàṅ. Al raś al partìs acsè sénsa equipàǵ a bōrd.

In séguit Kelloway al và da lōr par dir-ag ch'la misiòṅ l'è saltàda par paùra ch'l'andìs mâł, e a risć dal viti, ma lōr i gh'aṅ da far finta 'd rivàr listés su 'l pianēd rós p'r al bèṅ dla nasiòṅ e di piàṅ dla NASA ch'la gh'à biśógn di fónd dal guèran p'r andàr avànti o sinò l'è la fiṅ. 'L è tut bèla urganiśâ, lōr i gh'aràṅ da giràr un pôc su 'n sit marsiàṅ fat 'd sàbia e giaròṅ in un studi televiśìṿ. In séguit, quànd la navéta la turnarà su la Tèra, i i andràṅ a tōr su n'ìśula. Quànd Brubaker al fà inténdar ch'la sò cusînsia la gh diś ch'al n pōl minga, Kelloway al gh fà capìr ch'l è méj ch'al faga cum al gh'à dit lò o sinò la sò famìja e sò mujēr Kay (Brenda Vaccaro) i prév'n anc far na bruta fiṅ.

A riva 'l mumènt dal śbarc e tut l'Amèrica la s al bév in dirèta televiśìva, a gh'è sōl un tècnic, Elliot Whitter (Robert Walden), ch'al capìs ch'a gh'è quèl ch'a traśa parchè al véd ch'al cumunicasiòṅ di astrunàuta i rìvan da tarśènt mia da la baś. Dòp avēr-an dascōrs cun Kelloway e c'n un sò amìg giurnalìsta, Robert Caulfield (Elliott Gould), al sparìs sénsa dir gnint.

Al dè dal ritóran dal Capricorn One a sucéd ch'la navéta la ciàpa fōg. I tri astrunàuta, ch'i éran prònt a 'ndàr su l'ìśula p'r èsar pò recuperâ cuma di eróe, i vìnan fat turnàr indrē in dal capanòṅ di studi televiśìṿ. Brubaker al capìs ch'la misiòṅ l'è andàda stòrta e dònca adèsa p'r al Stat i n pōlan piò armàgn'r in vita, c'n al risć ad psēr cuntàr qvél ch'l è sucès dabòṅ, anc parchè par la nasiòṅ i èṅ tut mòrt. Insém a chi àtar dū al decìd acsè ad scapàr via in aparéć finénd però in dal deśèrt maśagnóś a òvest da Tèxas avénd finî 'l carburànt, cun di elicòtar federài ch'i gh dànan la casa par cupàr-i.

In cal méntar Robert al naśa ch'a gh'è quèl ad strâṅ. Cun 'l ajùt dla sò amìga giurnalìsta Judy Drinkwater (Karen Black) al próa a 'ndàr-'g a fónd ma di mémbar dal guèr'n i próan a far-al fóra par far-al taśēr.

Culegamènt estéran