Buio Omega
|
C'l artìcul chè 'l è scrit in
Miranduléś |
 Buio Omega
| ||
 Kieran Canter e la Monreale in na figùra dal film | ||
| Scûr Òmega 1979 | ||
|---|---|---|
| Regìa: Joe D'Amato | ||
| Scritōr: Ottavio Fabbri • Giacomo Guerrini | ||
| Atōr: Kieran Canter • Cinzia Monreale Franca Stoppi • Sam Modesto • Anna Cardini Lucia D'Elia • Mario Pezzin • Simonetta Allodi Walter Tribus • Klaus Rainer • Edmondo Vallini | ||
| Müsica: Goblin | ||
| Léngua: Itagliàṅ | ||
| Dürä dal film: 90 minüt | ||
| Nasiōṅ: Itàglia | ||
Buio Omega (Scûr Òmega), cgnusû anc c'n al tìtul 'd In quella casa... buio omega, 'l è 'n film ad scarésa dal 1979 ad Joe D'Amato ch'al tōś spunt in dal sugèt da n'atra pelìcula dal 1966, Il terzo occhio ad Mino Guerrini.
La part dal prutagunìsta l'è stada dada a Kieran Canter che pò al s è mis a far 'l atōr pòran.
Sunt
Francesco (Kieran Canter) al fà 'l imbalsamadōr e al viṿ insém a la guvernànta Iris (Franca Stoppi) dòp ch'i sò genitōr i èṅ mòrt. P'r al fat che la dóna l'è inamuràda 'd lò in segrét, un dè la decìd ad pagàr na stria par far un surtiléǵ vudù a la sò muróśa, l’Anna (Cinzia Monreale), par via ch'a gh sucéda quèl ad brut e avér acsè camp lìbar sèg. Quànd l’Anna la mōr dabòṅ, Francesco al decìd ad tiràr-la fóra da la fòsa e 'd imbalsamàr-la p'r avér-la sèmpar sèg in dal sò lèt. Na ragàsa ch'la fava 'l autostop (Lucia D'Elia) la 'l bèca e lò al la masa, pò l’Iris la 'l ajùta a far-la sparìr in d'l àcid dòp avér-la fata a pès cun na manàra.
Francesco al và a cùrar in un parc e 'l incróśa na ragàsa ch'la s è fata mâł a 'n pē (Anna Cardini). Dòp avér-la purtàda a cà sua par curàr-la i dū i finìs'n a lèt ma quànd la śōvna la fà a mènt che darènt a lē a gh'è 'n cadàvar, la taca a sigàr. Par far-la taśēr Francesco al gh tira 'n cōlp pò, cardénd-la mòrta, al la buta in dla stua cun 'l ajùt dla guvernànta. La ragàsa la s mōṿ incóra ma par pôc parchè la mōr bruśàda in dal fōg.
A cal punt lè l’Iris la s fà avànti e la gh admanda 'd spuśàr-la e ad far sparìr al còrp ad l’Anna. Al ragàs al gh'astà ma a pat ad tgnir al cadàvar sèmp'r in dla vila.