Brigitte Nielsen

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

La Gitte in dal 1985


La Gitte Nielsen, cgnusùda méj cuma Brigitte Nielsen (Rødovre, 15 ad Luj dal 1963, a s lèś [ˈbʁigedə ˈnelsn̩] in danéś), l'è na mudèla, showgirl, persunàǵ televiśìṿ, cantànta e atōra danéśa naturaliśàda itagliàna.

La gh'à abû dimóndi sucès in di an Utànta quànd l'éra la mujēr ad Sylvester Stallone. La Nielsen la gh'à sinc fiōi e la s è spuśàda sinc vòlti, l'ultma cun 'l itagliàṅ Mattia Dessi in dal 2006.

Biugrafìa

Fiōla dna bibliutecàra e 'd 'n inśgnēr, la Brigitte la taca na caréra da mudèla a 'l inìsi di an Utànta, dasfrutànd anc al fat 'd èsar dimóndi élta (1,85 m), laurànd p'r i stilìsta Gianni Versace, Giorgio Armani e Ferré fra New York, Parì e Milàṅ. In dal 1985 la gira 'l sò prim film par Dino De Laurentiis, Yado, insém a Arnold Schwarzenegger.

La Nielsen tòlta śò in dal 2010
La danéśa a Viéna in dal 2012

Sèmp'r in dal 1985 la cgnós 'l atōr Sylvester Stallone ch'al dvènta sò marè e ch'al la vōl sèg in dal pelìculi Rocky IV e Cobra. Finî 'l sò matrimòni la riva in Itàglia par tōr part a 'l prugràma dal sàbat ad Canale 5 Festival insém a Pippo Baudo e a la Lorella Cuccarini. Durànt al show la canta 'l pès Everybody Tells a Story prudót par Giorgio Moroder ch'al gh dà la manéra 'd tacàr anc na caréra da cantànta.

La Nielsen la cuntìnua in chi an lè anc a far di film, tulénd part a Beverly Hills Cop II - Un piedipiatti a Beverly Hills II ad Tony Scott, a la pelìcula Domino da prutagunìsta e a 'l film ad scarésa 976 - Chiamata per il diavolo 2. In dal 1992 la preśénta 'l Fèstival da Sanremo insém a Pippo Baudo, la Milly Carlucci e l'Alba Parietti e la rècita in dla part dla Stria Négra in dla fiction Fantaghirò. In dal 1998 l'è a cap dla squàdra dal dóni élti in Ciao Darwin.

In dal 2000 la rècita in dal vìddeo Make Me Bad di KoЯn pò la tōś part a soquànt reality show cuma 'l Gran Fradèl VIP danéś (2003), La Talpa in Itàglia (2004) e 'l Gran Fradèl VIP ingléś (2005) in du la riva tèrsa. In dal 2009 Italia 1 la manda in ónda 'l prugràma Celebrity Bisturi cundót par l'Elisabetta Gregoraci ch'la fà védar soquànti sò uperasiòṅ ad belésa fati par di cirùśig plàstic.

Filmugrafìa

Discugrafìa

Àlbum

  • 1987 - Every Body Tells a Story
  • 1991 - I'm the One... Nobody Else
  • 2000 - No More Turning Back
  • 2001 - Tic Toc
  • 2002 - Gitta vs. RuPaul
  • 2008 - Brigitte Nielsen

Culegamènt estéran