Brainwaves - Onde cerebrali
|
C'l artìcul chè 'l è scrit in
Miranduléś |
 BrainWaves
| ||
| Brainwaves - Onde cerebrali | ||
 Keir Dullea e la Vera Miles in na figùra dal film | ||
| Óndi serebràli 1983 | ||
|---|---|---|
| Regìa: Ulli Lommel | ||
| Scritōr: Ulli Lommel | ||
| Atōr: Keir Dullea • Suzanna Love • Vera Miles Tony Curtis • Ryan Seitz • Percy Rodrigues Paul Wilson • Diane Doucette • Nicholas Love Corinne Wahl • Phillipe Carr • Roger Burgraff Michael DeFrancisco • Eve Brent • Jason Fong | ||
| Müsica: Robert Ragland | ||
| Léngua: Ingléś | ||
| Dürä dal film: 77 minüt | ||
| Nasiōṅ: Stat Unî | ||
Brainwaves - Onde cerebrali (Óndi serebràli) 'l è 'n film ad fantasiénsa americàṅ dal 1983 scrit e dirèt p'r Ulli Lommel, girâ c'n un budget ad sincsènt-mila dòlar a 'l incìrca.
Par la part dal dutōr Clavius la prudusiòṅ l'iva pinsâ ad tōr prima John Huston, che però al gh'iva 'n infurtùni, e pò Rock Hudson che però al n éra minga lìbar. Sōl in ùltim a s è pò sarnî Tony Curtis.
Sunt
La Kaylie Bedford (Suzanna Love) la n s pōl pròpria lamintàr-as dla sò vita parchè la gh'à na famìja ch'la gh vōl bèṅ, sò marè Julian (Keir Dullea), sò màdar, la Maria Koonan (Vera Miles), e sò fiōl pìcul Danny (Ryan Seitz). La sò pasiòṅ l'è andàr in barca a véla. Un dè, méntar la s cata in sità par dal còmpri, però a gh sucéd na daśgràsia in strada. Prima l'armàgn insaplàda c'n un tac in dal rutàj dal tram, andànd in a risć ad finìr-ag sóta, pò la gh la cava a libràr-as a 'l ùltim mumènt ma la finìs listés adòs a na màchina. 'L incidènt la la mét in un stat ad còma.
I dutōr Robinson (Percy Rodrigues) e Schroder (Paul Wilson) i l'òpran subìt ma a n gh'è gnint da far. La Kaylie la n mōr minga ma 'l sò sarvèl 'l è andâ, qvél ch'la pōl far 'l è vìvar cuma 'n àrbul in sna scrana a rudèli. A cal punt lè al dutōr Clavius (Tony Curtis) al śibìs a sò marè n'uperasiòṅ sperimentàla ad trasferimènt 'd óndi serebràli par mèś 'd un computer, in alóra fata sōl cun dal simi. A n ésend-ag minga da gl'atri manéri, Julian al gh dà via libra. Par 'l esperimènt al dutōr al dróa 'l sarvèl dna dóna ad San Francisco mòrta in chi dè lè, la Leila Adams (Corinne Wahl), cupàda da 'l sò muróś quànd lì lē la 'l vliva mulàr. 'L óm, ch'al gh'à 'n tatuàǵ in dal pōls cun dū X tacàdi, al gh'iva mulâ śò un stéreo in dla vasca da bagn méntar lē la s lavàva, fulminànd-la.
L'uperasiòṅ la và bèṅ e piàn piàṅ la Kaylie la s armét ma dal vòlti a gh vèṅ in mènt al mumènt in dua cl'atra dóna la murìva. Adès Julian al gh'à d'andàr-'g a fónd in présia, catàr al masadōr, al palestrâ Willy Meiser (Nicholas Love), prima che lò al la faga fóra p'r al timōr che a sò mujér a gh véggna in mènt al sò nóm. E difàti la Kaylie la s arcòrda 'l bras dal sasèṅ, cun cal tatuàǵ adòs.