Boogie Nights - L'altra Hollywood

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Boogie Nights
Boogie Nights - L'altra Hollywood
Boogie Nights - L'altra Hollywood.png
La Moore, Wahlberg e Macy in na figùra dal film
Nòt da dar-ag dèntar - Cl'atra Hollywood
1997
Regia: Paul Thomas Anderson
Scritùr: Paul Thomas Anderson
Atùr: Mark WahlbergJulianne MooreJon Brion
Burt ReynoldsJohn C. ReillyHeather Graham
Don CheadleWilliam H. MacyAlfred Molina
Müsica: Michael Penn
Lengua: Ingléś
Dürä dal film: 156 minüt
Nasiòṅ: Stat Unî


«
Tut i gh'aṅ un quèl speciàł.»
(Tagline dal film)


Boogie Nights - L'altra Hollywood (Nòt da dar-ag dèntar - Cl'atra Hollywood) 'l è 'n film dramàtic americàṅ dal 1997 ad Paul Thomas Anderson ch'al 'l à anc scrit. Par cl'òpra chè 'l è stâ candidâ a 'l Prèmi Òscar par la regìa in dal 1998 ma al n à minga vins acsè cuma la Julianne Moore e Burt Reynolds ch'i èṅ armàś a bèc sut.

La pelìcula, ch'la gh'à abû 'n sèrt sucès cumersiàł avénd muciâ sù da piò ad quaràntra-tri migliòṅ ad dòlar a frònt 'd un cóst ad quìndas, la dascór dal sucès e dla daśgràsia finàla 'd 'n atōr pòran in dla Califòrgna di an Stanta e di prim an Utànta faghénd riferimènt in na quàlc manéra a la vita 'd John Holmes, cgnusû in dal sò ambînt c'n al scutmàj ad „Sgnōr 35 cm“.

Sunt

In dal 1977 a San Fernando Valley al regìsta 'd film pòran Jack Horner (Burt Reynolds), mént'r al s cata in un lucàl nutùran, al buta 'l òć su 'n śōv'n ad darsèt an ch'al lava śò, Eddie Adams (Mark Wahlberg). Par Jack chi lò al gh'à i nùmar, dgém trénta-tri, par sfundàr in dal mónd di film malnét, specialmènt in dal sò òpri in dua al gh vōl métar dèntar na trama.

Eddie al gh astà e al sarnìs par lò al nóm 'd art ad „Dirk Diggler“, pò al gh'à la manéra 'd cgnósar la troupe ch'la lavurarà sèg. I sò culéga atōr i èṅ Buck Swope (Don Cheadle), cowboy ad culōr cun la pasiòṅ par la letrònica, Reed Rothchild (John C. Reilly), dimóndi gustóś e simpàtig ch'al dvènta prèst sò amìg, l’Amber Waves (Julianne Moore), drugàda, divursiàda e c'n un fiōl da tiràr sù, la purcùsa Rollergirl (Heather Graham) e la Becky Barnett (Nicole Ari Parker) dita „ciuculatèṅ fundènt“. I tècnig c'n al còmpit ad tiràr-i śò invéci i èṅ 'l ajùt-regìsta Little Bill (William H. Macy), al diretōr dla futugrafìa Kurt Longjohn (Ricky Jay) e 'l tècnig dal sòṅ Scotty J. (Philip Seymour Hoffman).

A 'l inìsi al ròbi i vaṅ a la granda par lò ma pò a nas al marcâ d'l home video e par l'indùstria dal pòran 'l è 'n brut cōlp. Dirk al gh'à pò 'n àtar prubléma: 'l è dvintâ 'n drugâ pódag. Par scampàr e catàr sù di bèsi 'l è anc custrét a prustituìr-as.

Culegamènt estéran