Blufin

Da Wikipedia.

C'l artìcol chè 'l è scrit in Carpśàn Emiliàn


La Blufin S.p.A l'è na cà 'd moda itagliàna fundèda a Chèrp da l'Anna Molinari e da só marì Gianpaolo Tarabini. Blufin la grùpa soquànti só merchi grosi c'ma la Blumarine, da 'l 1977, la Miss Blumarine (1987), l'Anna Molinari (1995) e la Blugirl (2002) [1], nòm ed moda élta.

La só storia

L'Anna Molinari in dal 2010

La merca Blumarine la vin tachèda dai spōś Anna Molinari e Gianpaolo Tarabini in dal 1977 a Chèrp in dla pruvèinsa ed Mòdna. Cal nòm chè i 'l àn tolt da 'l lōr culōr preferî, insèm a la lōr pasiòun per al mèr. In dal 1980 la Blumarine la và a sfilèr p'r el prìmi volti a Milàṅ e là i gh'dàn al titul ed "stilìsta ed l'anèda" ch'al gh'pirmitrà anca in dl an dòp ed vgnìr lè a la smàna edla moda. In dal 1986 in dal mèś edla smàna edla moda ed Milàn, la vin preśentèda la prìma colesiòun tùta disgnèda da l'Anna Molinari.

'L è in dal 1988 ch'la vin fundèda la cà Blufin. La prìma butéga Blumarine la véra i batèint in via edla Spiga a Milàṅ in dal 1990 e incō el só merchi egl'ìn vindùdi in piò 'd mìl negòsi, 'd indû anca 55 butéghi dedichèdi.

La famìja fundadōra

Nèda in dal 1939, l'Anna Molinari ed lung a 'l só lavōr l'à tolt sù dimòndi arcgnusimèint, e tra chi èter anc la nòmina a Cavaliér dal lavōr in dal 2010[2], mo p'r al só lung impègn anca in dal socêl (drē a 'l eśìmi eśèimpi ed só pèder al Guido Molinari), l'Anna la tulìva in dal 1990 al Prémi The Best, in dal 2001 al Prémi Meryl Awards, in dal 2004 al prémi specêl a la caréra edla Cambra Nasionèl edla Moda Itagliàna e 'l Prémi Marisa Bellisario, e in dal 2007 al Prémi Ambruśèin 'd ôr da 'l Cumùn ed Milàṅ. In dal 2005 i gh'dèven la Làvrea onòris càvśa in Sièinsi edl'Educasiòun a l'Universitê 'd Urbèin.

Anca la Rossella Tarabini, fióla edl'Anna Molinari la fà la stilìsta per la Blufin, màinter che Gianguido Tarabini, só fradèl, 'l à tachê a laurèr in dl'aśiènda in dal 1992, dvintènd al diretōr dal lisàinsi in dal 2004 e amministradōr deleghê in dal 2006, dòp edla mort ed só pèder.

Referèinsi

  1. (IT) In sìm'a 'l sit edl'aśiènda
  2. La só nòmina a Cavaliér dal lavōr in dal 2010

Collegamèint estèren