Guido Molinari
|
C'l artìcol chè 'l è scrit in
Carpśàn |
Guido Molinari (Cérvia in dal 1917 - Chèrp al 10 ed novèmber dal 1998) 'l è stê 'n imprenditōr e 'n benefatōr carpśàn.
Biugrafìa
Fiōl 'd un gros costrutōr ed Cérvia, da ragàs, Guido al tgniva drē a di stùdi 'd êrt a Ravèna e a Ròma, po' al tachèva a lavurèr c'ma incisōr ed lettri in dal mèrem fin dai só quatòrd'ś àn. Cgnusùda lè a Cérvia la só mujér carpśàna Odette Gualdi, Guido al gh'arà però da partìr pròpia in dal mèinter ch'i nasìven el só dō fióli śmèli l'Anna e la Licia. Guido al partìs per l'Africa in dû 'l jùta al pèder in soquànti costrusiòun anca grosi per gli Ōvri Publìchi śvèin a l'Etiòpia[1] e al vin anc fat perśunér daj ingléś durànt la guèra. Turnê a Chèrp, Guido al taca a lavurèr cun la mujér in dal só majfìsi "Molly", prima in dal cìc mo po' chersènd in dal grand, in dû a selta fóra n'ètra volta al só gros e-spìrit da imprenditōr.
Più avànti, a la mort dla mujér, Guido al decìd ch'al vōl vèder crèser e mijorèr soquànt repêrt edl uspidêl ed Chèrp "B. Ramazzini", e al tribùla personalmèint cui trapê dla burocrasìa e 'l spend dimòndi bési per mèt'r a nōv la cardiulugìa, la Tac, l'urologìa, al Pront Socórs, che acsè tanti curi i psìven vgnir fati a Cherp invéci che avér-eg d'andèr a dmandèr-i a Mòdna[2].
Guido al gniva premiê cun dimòndi arcgnusimèint, c'ma quêl ed Cavaliér dla Repùblica, 'd Cavaliér Uficêl, ed Cmendadōr, 'd Grand'Uficêl e 'd Cavaliér ed Gran Crōś[3]. A Chèrp la gh'è stèda intestèda la strèda dl uspidêl, a dir quèla ch'l'era la via ed S. Giàcom.
La fióla Anna l'è la padròuna edla firma "Blumarine" ed Chèrp.
Colegamèint estèren
- (IT) 'N artìcol a lò dedichê in dal decenêl dla só mort in sìm'a La Voce ed Chêrp in dal novèmber 2008