Blood Simple - Sangue facile
|
C'l artìcul chè 'l è scrit in
Miranduléś |
 Blood Simple
| ||
| Blood Simple - Sangue facile | ||
 La Frances McDormand in na figùra dal film | ||
| Blood Simple - Sànguv fàcil 1984 | ||
|---|---|---|
| Regìa: Joel Coen • Ethan Coen | ||
| Scritōr: Joel Coen • Ethan Coen | ||
| Atōr: Frances McDormand • M. Emmet Walsh John Getz • Dan Hedaya • Samm-Art Williams | ||
| Müsica: Carter Burwell | ||
| Léngua: Ingléś • Spagnōl | ||
| Dürä dal film: 99 minüt | ||
| Nasiōṅ: Stat Unî | ||
Blood Simple - Sangue facile (Blood Simple - Sànguv fàcil) 'l è 'n thriller dal 1984 scrit, dirèt e prudót p'r i fradèi Coen Joel e Ethan.
La pelìcula l'è custàda un migliòṅ e mèś ad dòlar e la 'n à fat sù tri e òt.
Sunt
Julian Marty (Dan Hedaya), spuśâ cun l’Abby (Frances McDormand), al gh'à 'n night in Tèxas in du i gh lavóran da barìsta Ray (John Getz) e Meurice (Samm-Art Williams). Cardénd ch'la sò spóśa la gh méta i còran, al gh fà tgnir adrē par 'l investigadōr privâ Loren Visser (M. Emmet Walsh) e, quànd chi lò al gh pòrta dal fóto 'd lē a lèt cun Ray, Julian al pèrd la tèsta. Al decìd acsè ad far-'g-la pagàr andànd a dar-ag dū marùc p'r insgnàr-'g a star a 'l mónd ma a finìs ch'a ciapàr-li 'l è lò.
Umiliâ su tut i frònt da sò mujēr, al decìd ad śibìr di bèsi a Visser par cupàr-la insém a 'l sò amànt méntar lò 'l è via a pascàr fóra sità. La nòt d'l apuntamènt 'l investigadōr al pòrta 'l fóto di cadàvar a Marty cuma cuncurdâ e, quànd chi lò al gh ślunga i bèsi, al gh spara cun la pistòla ch'l iva purtâ via a l’Abby. Fra 'l àtar Marty 'l è stâ fargâ dū vòlti parchè la próa dal masamènt l'éra sōl un fóto-muntàǵ.
A pasa pôc ch'a riva lè Ray par dmandàr al stipéndi a 'l sò padròṅ. Catànd-al mòrt e vdénd par tèra la pistòla dl’Abby, 'l óm al créd ch'la sasìna la sia lē. Par lugàr incòśa, al decìd su 'l mumènt ad traśàr via 'l cadàvar p'r andàr-'l a saplìr in mèśa campàggna. Durànd al viàś al s rénd però cònt che Marty al n è minga mòrt dabòṅ ma 'l decìd listés ad butàr-'l incóra viṿ in dla fòsa ch'l à scavâ par pò quaciàr-'l ad tèra e far-la finìda sèg.