Articolo 31

C'l artìcul chè 'l è scrit in Miranduléś

«

"Quali sono i tuoi interessi? Cosa ti piace fare? Quali sono i tuoi progetti per stasera?", "Per essere sincera avrei un appuntamento, un corso di pittura, non posso mancare, stasera ho proprio voglia di usare un pennello, con un pennello in mano mi posso realizzare!", "Senti bella, potevi anche dirlo che avevi solo voglia di prendere il pennello, il corso di pittura puoi anche lasciarlo a casa, io ho un pennello, è lungo, largo, forte e bello, lo uso proprio come fossi un vero artista, e con il mio pennello sono un gran professionista!"»

(IT)(Tocca qui, 1993)

«

"Quài èṅ-i i tò interès? Cuś è'l ch'at piàś far? Quài èṅ-i i tò prugèt par stasìra?", "P'r èsar franca a gh'arév 'n apuntamènt, un cōrs ad pitùra, a n pòs minga mancàr, stasìra a gh'ò pròpria vója ad druàr un pnèl, cun un pnèl in maṅ a pòs dir 'd ès'r a pòst in dla vita!", "sènt mò chè belésa, at psiv anc dir-al ch't iv sōl vója ad ciapàr al pnèl, al cōrs ad pitùra at pó anc lasàr-'l a cà, mè a gh'ò 'n pnèl, 'l è lung, larg, fòrt e bèl, a 'l dróv pròpria cuma s a fus 'n artìsta dabòṅ, e cun al mè pnèl a sòṅ un gran prufesiunìsta!"»

(MUD)

Gl’Articolo 31 i èṅ stâ un grup muśicàl rap e crossover itagliàṅ mis in pē in dal 1990 a Milàn p'r òpra ad J-Ax e dal DJ Jad. I èṅ andâ avànti in fiṅ a 'l 2005 quànd i aṅ tacâ na caréra da par lōr.

Biugrafìa

J-Ax e al Dj Jad, rapper òṅ e disc jockey c'l àtar, i s cgnósan in dal 1990 durànt na fèsta hip hop e i decìdan ad métar sù 'n grup muśicàl tulénd al nóm da na léǵ dal 1960 dl’Irlànda (la Section 31 del Broadcasting Authority) ch'la mitìva la muśaróla a la libertà 'd espresiòṅ in televiśiòṅ e a la ràddio.

Dòp un prim sìngul (Nato per rappare), in dal 1993 a véd la luś al prim àlbum Strade di città cun dèntar di braṅ quài Tocca qui (Tóca chè), Pifferaio magico (Sibiulàr màgic) e Ti sto parlando (A sòṅ drē a dascórar tèg). Par la prima vòlta in Itâglia, un grup rap al gh la cava a rivàr in clasìfica cun 90.000 còpi vindùdi a 'l incìrca.

Cun Ohi Maria (ch'la s cata in dal disc Messa di vespiri e ch'la dascór dla marijuana) al grup al vins Un disc par l'Istâ dal 1995. Adriano Celentano al gh l'à sèg e al gh in diś quàtar in dal sò braṅ Il seme del rap (Ragasōi ch'i śbràg'n i maròṅ cun al rap).

In dal 1996 l'è la vòlta ad Così com'è ch'al vénd un quèl cuma mèś migliòṅ ad còpi anc par via ad canti cuma Tranqi Funky, Domani, 2030 e Il funkytarro. Cal lavōr lè al vèṅ vindû anc in Śvisra e in Germâgna. Anc Nessuno dal 1998 al mùcia sù dimóndi sucès e al prim sìngul 'l è La fidanzata ch'al strica 'l òć a la canta Mamma voglio anch'io la fidanzata ad Natalino Otto.

I ùltim lavōr dal grup i èṅ Xché sì!, Domani smetto e Italiano medio.

Discugrafìa

Àlbum

1993 - Strade di città
1994 - Messa di vespiri
1996 - Così com'è
1998 - Nessuno
1999 - Xché sì!
2002 - Domani smetto
2003 - Italiano medio

Racòlti

2000 - Greatest Hits

da 'l Viṿ

2005 - La riconquista del forum

Culegamènt Estéran

(IT) Al sò sit uficiàl