Andrea Minguzzi

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Andrea Minguzzi tòlt śò in dal 2013


Andrea Minguzzi 'l è un lutadōr itagliàṅ in dla categurìa di 84 kg nâ a Castèl San Pîr in Provîncia ed Bològna al 1 ad Favràr dal 1982. Al s è stablî a Iommla.

Biugrafìa

Fiōl d'art - al pàdar Massimo 'l è stâ un lutadór anca lò in di an Stanta - 'l à tacâ la sò carèra in d'l U.S. Placci Bubano ad Murdàn. Pasâ a 'l Club Atletico CISA ad Fënza al vèṅ alenâ dal campiòṅ ulìmpic Vincenzo Maenza. Dal 2004 al fà part dal Fiàmi Or, al grup spurtìv dla Pulìsia dal Stat.

Minguzzi 'l à vins un tìtul a squàdri (2006) e 8 tìtui individuài (dal 2000 al 2007) a livèl ad campiunàt itagliàṅ, mèntar 'l à vins la mdaja ad brónś a i Europei ad categurìa in dal 2007 e in dal 2008.

Campiòṅ ulìmpic 2008 in Cina

Al 14 'd Agóst dal 2008 'l à batû in finàl 'l ungheréś Fodor (ch'l éra favurî) e 'l è dvintâ Campiòṅ ulìmpic a Pechèṅ, al prim di nòstar a cavàr-gh-la, vint an dòp al sò mìstar Vincenzo Maenza.

In dal turnèo 'l à batû in d'l órdan al francéś Melonin Noumonvi al prim tùran, al campiòṅ dal mónd e ulìmpic in carga, al rus Alexei Michine in di quàrt ad finàl, al śvedéś Ara Abrahamian in na semifinàla dimóndi cumbatùda e 'l ungheréś Zoltan Fodor in finàl.

Durànt la serimògna ad premiasiòṅ, al śvedéś Abrahamian, dòp ch'i gh'aṅ dâ la mdaja ad brónś, al l'à śbatùda via in mèś al camp par prutèsta còntra i giùdaś par la gara pardùda cun Andrea.

Al 26 ad Śugn dal 2009 al perd in finàl còntra al crùat Nenad Zugaj a i Śóg dal Mediteràneo e al gh'à da cuntintàr-as dla mdaja 'd argènt.

Minguzzi al fà al sò duvér ad pulisiòt

Al 5 ad Setémbar dal 2010, Andrea Minguzzi 'l è stâ prutagunìsta 'd un at eròic anc p'r al fat 'd èsar un pulisiòt. 'L à farmâ e fat arestàr un tisi ad 35 an ciamâ Claudio Zuppardi cun al Scutmaj ad «Palumella», uriginàri ad Mergellina ad Nâpol. Lì lò 'l iva curtlâ, dòp na barùfa par di mutiṿ da gnint, 'n amìg dal campiòṅ ulìmpic in di cèso dna discutéca ad Milân Marêtima davśèṅ a Ravêna.

Unurificènsi

P'r al vulér dal Presidènt dla Repùblica Giorgio Napolitano, al 5 ad Setémbar dal 2008, Andrea Minguzzi 'l è stà numinâ Cumendadór Órdan al Mèrit dla Repùblica.

'L è anc Culàr 'd òr al Mèrit Spurtìṿ.