Violenza estrema
|
C'l artìcul chè 'l è scrit in
Miranduléś |
 Cette femme-là
| ||
| Violenza estrema | ||
 La Balasko e Éric Caravaca in na figùra dal film | ||
| Viulénsa sénsa lìmit 2003 | ||
|---|---|---|
| Regìa: Guillaume Nicloux | ||
| Scritōr: Guillaume Nicloux | ||
| Atōr: Josiane Balasko • Thierry Lhermitte Éric Caravaca • Ange Rodot • Aurélien Recoing Frédéric Pierrot • Pascal Bongard • Alex Descas | ||
| Müsica: Éric Demarsan • Fabio Viscogliosi | ||
| Léngua: Francéś | ||
| Dürä dal film: 100 minüt | ||
| Nasiōṅ: Frància | ||
Violenza estrema (Viulénsa sénsa lìmit) 'l è 'n film śal francéś dal 2003 ad Guillaume Nicloux ch'al 'l à anc scrit.
Cl'òpra chè, ch'la s ciàma Cette femme-là in uriginàł (Cla dóna là), l'è 'l secónd capìtul dna trilugìa ad pelìculi dal gènar pulisiésc tacàda in dal 2002 cun Una questione privata e finìda in dal 2007 cun La clef.
'L è stâ girâ c'n un budget ad quàtar migliòṅ e quàt'r ad dòlar ma al n gh l'à minga cavàda a far cònt para parchè al s è farmâ a òṅ a 'l incìrca.
Sunt
La Michèle Varin (Josiane Balasko) l'è na dóna ch'l'à pasâ i sinquànta e ch'ad mistēr la fà la capa 'd pulisìa. Soquànt an prima, al 29 ad Favràr, l'à pardû 'l sò ùnic fiōl ch'al gh'iva òt an e adès l'è dimóndi turmintàda e la viṿ mâł, specialmènt quànd a s davśìna cla data lè. A far-ag cumpagnìa, da quànd la s è divìśa da Denis (Alex Descas), a gh'è armàś un cunèṅ che però al n è mis minga tant bèṅ, a dita dal veterinàri Ogel (Nicolas Jouhet), parchè 'l à śmis ad magnàr. Par pasàr-'s al tèmp invéci la fà di puzzle e par pruàr a saltàr-ag fóra e par casàr via tut i sò arbgàt la và da 'n psicòlug, al dutōr Borde (Hammou Graïa).
Na sira, méntar l'è drē a turnàr a cà sóta 'n śguàs ad c'l àtar mónd, la ricév na telefunàda da 'l ispetōr Sylvain Bazinsky (Éric Caravaca) ch'al gh diś ch'i aṅ péna catâ na dóna impicàda in di bòsc 'd Essarts sénsa na scarpa. A s créd ch'la s sia tòlt la vita. In dla schina i gh càtan di castròṅ fat cun na scùria.
Sèmp'r in chi dè lè la dóna la ricév na denùnsia 'd 'n óm (Frédéric Pierrot), Daniel 'l è 'l sò nóm, ch'al gh'à abû la sò fàbrica in part bruśàda par cólpa dla benśìna che qualchidòṅ 'l à stramnâ p'r impisàr di fōg. La Michèle la taca a 'ndàr fóra sèg e pò la gh finìs anc a lèt par pò savēr ch'l è stâ lò a muntàr sù la cumèdia.
In cal mént'r a s vèṅ a savēr che la dóna ch'la s è impicàda, la sgnōra Atken (Anne-Marie Falot), l'éra dimóndi śò. Esénd in depresiòṅ l'andàva in 'n istitùt psichiàtric e la gh'iva dimóndi paùra dal Diàvul e la vdiva di fantàśma cun di tabàr e 'n capùs in cô. La Michèle la và a far dal dmandi a sò anvōda (Florence Loiret-Caille) e la ragàsa la gh diś che sò sîna la s éra divìśa da sò marè subìt dòp ch'a gh'éra nada na putìna, la Claire (Valérie Donzelli), ma adès la n sà briśa che fiṅ l'àppia fat la baghéta.
Na sira, méntar l'è drē a urdnàr na pizza a 'l telèfun, la bèca na parsòna c'n un capùs e 'l tabàr in cà sua. La próa a cùr'r-'g adrē in strada ma a n gh'è gnint da far. L'à-la vduda dabòṅ o 'l éra sōl un brut insùni? Su 'l tàvul a gh'è scrit SUICÌDI, pò a partìs la ràddio da par lē a 'l piàṅ ad sóta, in sla pultròna a gh'è 'l óm cun na tùnica négra ch'al la guàrda e al rid: la Michèle la sa spara in bóca ma 'l è sōl 'n arbgàt. A pâr ch'la Michèle la sia drē a vìv'r i stés quèi dla dóna impicàda.
A s vèṅ pò a savēr che la sgnōra Atken, prima 'd murìr, l'iva pruâ a catàr sò fiōla dada in afidamènt trént'an prima. La Michèle la và alóra a dascórar cun Yvan Thiel (Clément Thomas), al tisi ch'al gh l'iva sèg fiṅ a tri méś prima. Chi lò 'l arcgnós in na foto la sgnōra Atken cuma na cliènta dal un sò negòsi 'd artìcui pòran, al Club 69. L'ultma vòlta ch'al l'à vduda la dóna la gh'iva dit che lò 'l éra 'l Diàvul.
Tut 'd un trat al s cópa anc Bazinsky e anc a lò a gh calàva na scarpa, pò a salta fóra ch'al gh'iva anc 'n “amìg” (Yann Goven) che però al n créd briśa ch'al pòsa ès'r-as cupâ da par lò anc parchè al gh'iva 'd andàr a catàr in chi dè lè sò fiōla ch'la stava da n'atra banda. A la fiṅ la drita giùsta al gh la dà 'n baghét, Léo (Ange Rodot), ch'al stà cun sò màdar, la sgnōra Kopmans (Eva Ionesco), in un caravan a Essarts. Al masćèṅ al gh diś ch'l iva dascōrs in di bòsc cun Sylvain prima ch'al fus catâ mòrt.