Roulette
Artéccol in dialètt mudnés 
La roulette l'è un śóg 'd aśàrd ch'la gh'à di urìgini itagliàni (la girella) purtâ in Francia in dal sècul XVIII. La s cata in di Caśinò.
Al śóg al gh'à un disc diviś in 37 tachi numeràdi da śèr (culurâ ad vérd) a trentasiē (tut culurâ ad négar o rós) ch'al vèṅ prilâ da 'n óm ciamâ croupier che pò a gh buta dèntar na bucìna bianca. La bucìna la cur in dal sèns cuntràri al disc: quand la s férma, cascand śò in òṅ di 37 setór, a s càpis qual è al nùmar ch'l à vins.
Indice |
[modifica] Linguàǵ
La lingua ch'a s dróa ad sòlit in dal śóg l'è al francéś e quést chè i èṅ i dascórs ch'a s fà durànt al puntàdi:
- Faites vos jeux, messieurs! (Śgnór, fav i vòstar śóg!)
- Les jeux sont faits, rien ne va plus. (I śóg i èṅ stâ fat, al puntàdi i èṅ saràdi.)
- Le numéro gagnant est... (Al nùmar ch'al vins 'l è...)
Generalmènt quand al croupier al diś qual è al nùmar vincènt, al diś anc s'l è rouge o noir (rós o négar), pair o impair (para o dìspar) e manque o passe (s'l è più alt o più bas ad daśdòt).
Quand a vèṅ fóra al nùmar śèr a vins al banc.
[modifica] Mudèi ad roulette
I gh'èṅ tri mudèi ad roulette:
- roulette francéśa: 'l è al tàvul clàsic, cun i nùmar da 0 a 36. Al difarènsi i sàltan fóra quand a vèṅ fóra al nùmar śèr. S'al śóg al gh'à la règula dl' en prison (in parśòṅ), al puntàdi i vénan farmàdi p'r un gir e dadi indrē sól s'a vèṅ fóra al nùmar sarnî prima. In Europa però ad sòlit a s dróa n'atra régula ch'la diś che i bèsi i vénan divìś fra al banc e i śugadór, mèś p'r òṅ.
- roulette ingléśa: l'è cuma quéla francéśa ma a n s dróa minga la régula en prison e pò a gh'è un sól croupier e minga tri.
- roulette americàna: la gh'à 37 nùmar (śèr e dòpi śèr 00) e quàtar cumbinasiòṅ, GOLD (5,7,11,17,20,22,26,30,32,34), SILVER (00,1,3,10,13,15,24,25,27,36), AMERICANA (6,8,9,12,18,19,21,28,29,31) e SMALL (0,2,4,14,16,23,33,35).
[modifica] Statìstica
La roulette, cuma tut chi àtar śóg 'd aśàrd in dua a gh'è un banc, la s tèṅ par lē na percentuàl sicùra ad vantàś su i śugadór ch'l'è dal 2,70% a 'l incìrca, piutòst basa in di cunfrónt di àtar śóg cuma al Lòt e al Totocalcio (chè l'è dal 60%).
S'a s śóga un sól nùmar, a s gh'à na prubabilità dal 2,70% ad vìnsar al cólp (2,63% in quéla americàna, ch'l'è più basa parchè la gh'à 37 nùmar e minga 36).
[modifica] Al śugàdi
Al cumbinasiòṅ ad śóg i èṅ quésti chè:
- Plein, nùmar sìngul, a s vins 35 vòlti la puntàda
- Cheval, cavài, o còpi ad nùmar, a s vins 17 vòlti la puntàda
- Transversale Pleine, tersìni, a s vins 11 vòlti la puntàda
- Carrè, quartìni, a s vins 8 vòlti la puntàda
- Transversale Simple, sistìni, a s vins 5 vòlti la puntàda
- Douzaine, dudśìni (prima, secónda o tèrsa), a s vins 2 vòlti la puntàda
- Colonne, culóni (prima, secónda o tèrsa culóna dal tàvul), a s vins 2 vòlti la puntàda
- Pair ou Impair (o Even or Odd in ingléś), para o dìspar, a s vins la puntàda
- Manque ou Passe (i nùmar 1/18 o 19/36), a s vins la puntàda
Atri cumbinasiòṅ ad śóg i èṅ:
- Voisins du zero (davśèṅ al śèr): 17 nùmar intóran al śèr
- Tier du cylindre (la cumbinasiòṅ 5/8): 12 nùmar da cl'atra banda di nùmar davśèṅ al śèr
- Orphelins (urfanèi): 8 nùmar ch'i n faṅ minga part dal du cumbinasiòṅ chè 'd sōvar
