Pac-Man

Da Wikipedia.

C'l artìcul chè 'l è scrit in Miranduléś Emiliàn

Na figùra dal śōg


Al Pac-Man (cgnusû in Giapòṅ cun al nóm ad Pakkuman, パックマン) 'l è 'n śōg vìddeo invintâ par Tohru Iwatani prugramadōr dla Namco e publicâ par la prima vòlta da la Midway Games al 22 ad Maǵ dal 1980 in dal furmâ arcade p'r al sali. In séguit 'l è dvintâ dimóndi famóś in tut al mónd, gnénd fóra par console e computer.

Règhli

Al Pac-Man

Al śugadōr al gh'à purtàr in gir, a 'l intéran 'd un labirìnt, un putòć tónd ad culōr śal, ciamâ Pac-Man, faghénd-ag magnàr tut i puntèṅ stramnâ lè 'd intóran, stand bèṅ atènti 'd a n tucàr briśa i quàtar fantaśmèṅ ch'i s móvan lè sèg curénd-'g a drē. S'a sucéd cal fat lè, al śugadōr al pèrd una dal sò viti.

Par gnir-'g incòntar, in di quàtar cantòṅ dal parcórs i s càtan dal madśìni particulàri più grandi, diti "power pills", ch'i arbàltan la situasiòṅ faghénd in manéra che, se magnàdi, i sìan i fantàśma, dvintâ in cal méntar blù, a 'ndàr in a risć 'd èsar mandâ śò par soquànd secónd ad tèmp. Quànd quést a sucéd, al śugadōr al mùcia sù di punt e quél ch'a gh rèsta di fantaśmèṅ (sōl i sò dū òć) al tórna indrē in présia a la baś, ch'la s cata in dal sèntar dal schérum, par turnàr in vita ad nóṿ e dar acsè incóra adòs a 'l Pac-Man.

In dal sèntar dal labirìnt, da 'l dū bandi, a gh'è 'n andavèṅ ch'al parmét a Pac-Man, e sōl a lò, ad pasàr subìt da cl'atra banda, un quèl dimóndi ùtil par scapàr via quànd a s è mis mâl.

Quànd tut al magnàr dal labirìnt al finìs, a taca 'n livèl nóṿ.

Puntéǵ

Durànt al śōg, tut quél ch'al Pac-Man 'l è bòṅ ad magnàr al gh dà di punt. Al bucìni stramnàdi in dal parcórs i vàlan 10 punt (in dal labirìnt a gh 'n è 240, p'r un tutàl ad 2.400 punt) mént'r al power pills i gh śòntan 50 punt (200 in tut, esénd quàtar). S'a s fà fóra i fantàśma, a s pòrta a cà 200 punt p'r al prim, 400 p'r al secónd, 800 p'r al tèrs e 1.600 p'r al quàrt, muciànd sù a 'l màsim 3.000 punt par vòlta ch'i dvèntan 12.000 punt a dispuśisiòṅ cuntànt al quàtar madśìni. Durànt al śōg a pōl sucédar ch'in dal mèś dal labirìnt i végnan fóra par pôc tèmp di magàr speciài (in gènar dla fruta): s'al Pac-Man al gh la cava a far-i suo prima ch'i sparìsan da par lōr, al s pōl purtàr in bisàca ch'i punt chè 'd sóta:

  • Sréśa, 150 punt
  • Fràgula, 300 punt
  • Purtugàl, 500 punt
  • Póm, 700 punt
  • Ua, 1.000 punt
  • Sìmbul dal śōg vìddeo Galaxian, 2.000 punt
  • Campàna, 3.000 punt
  • Ciàṿ, 6.000 punt

Quànd a s mùcia sù almànc 10.000 punt, a s pòrta a cà na vita.

Al puntéǵ più grand ch'a s pōl rivàr a far 'l è quél ad 3.333.360 (dit perfect score) parchè a gh'è 'n bug in dal śōg ch'al n parmét minga ad pasàr al 256śum livèl (la variàbila dal livèl la gh'à sōl 1 byte): par far-al a gh'è da magnàr sèmp'r incòsa. Al prim a far-al 'l è stâ Billy Mitchell in dal 1999, 'l ùltim invéci David Race al 4 ad Śnar dal 2012, ch'al gh'à mis 3 óri, 33 minùt e 12 secónd.

I quàtar fantaśmèṅ

I quàtar fantaśmèṅ prutagunìsta dal śōg i èṅ:

  • Blinky ad culōr rós: 'l è al piò rabî ad tut, sémpar prònt a dar la casa a 'l Pac-Man;
  • Inky ad culōr celèst: al s dà da far par mét'r-as ad travèrs stupànd al tunnel ad pasàǵ;
  • Pinky ad culōr ròśa: l'è la fémna dal grup, la gira dimóndi in présia e l'è catìva dagnóra cuma Blinky;
  • Clyde ad culōr aràns: 'l è al piò insiminî, imbambî e minciòṅ dal grup, al và in gir piàṅ faghénd anc di parcórs a caś.

Culegamènt estéran