Nella morsa del ragno
|
C'l artìcul chè 'l è scrit in
Miranduléś |
 Along Came a Spider
| ||
| Nella morsa del ragno | ||
 Freeman e la Potter in na figùra dal film | ||
| In dla strica dal ragn 2001 | ||
|---|---|---|
| Regìa: Lee Tamahori | ||
| Scritōr: James Patterson • Marc Moss | ||
| Atōr: Morgan Freeman • Billy Burke • Jill Teed Monica Potter • Michael Wincott • Mika Boorem Anton Yelchin • Kim Hawthorne • Scott Heindl Jay O. Sanders • Michael Moriarty • Dylan Baker Penelope Ann Miller • Anna Maria Horsford | ||
| Müsica: Jerry Goldsmith | ||
| Léngua: Ingléś • Rus | ||
| Dürä dal film: 104 minüt | ||
| Nasiōṅ: Stat Unî • Cànada • Germàgna | ||
Nella morsa del ragno (In dla strica dal ragn) 'l è 'n thriller americàṅ, tedésc e canadéś dal 2001 ad Lee Tamahori trat da 'l rumànś „Arcòrda la Maggie Rose“ ad James Patterson. 'L è 'l séguit dla pelìcula Il collezionista dal 1997 sèmpar cun Morgan Freeman.
Custâ ssanta migliòṅ ad dòlar, al film al 'n à fat pò fat sù da piò ad sènt-sinc.
Sunt
Durànt un tintatìṿ 'd incastràr un serial killer a mōr in 'n incidènt in màchina l'agìnta Tracie Fisher (Jill Teed) e 'l sò culéga e psicòlug Alex Cross (Morgan Freeman) al taca a 'vér di sèns ad cólpa p'r avér-la vduda murìr sénsa psēr far gnint. Chi lò al decìd acsè ad ritiràr-as da 'l lavōr.
Soquànt méś dòp però 'l è custrét a turnàr a lauràr par la pulisìa quànd un prufesōr 'd infurmàtica ciamâ Gary Soneji (Michael Wincott) al rapìs, in na scōla p'r i fiōi di óm pulìtic più impurtànt di Stat Unî e minga sōl, la fiōla dal senadōr Hank Rose (Michael Moriarty), la Megan (Mika Boorem). A jutàr-'l in dgl'indàśin a gh pénsa l'agìnta di servìsi segrét Jezzie Flannigan (Monica Potter) ch'la tgniva 'd òć Soneji da dū an ma ch'la n è minga stada bòna 'd farmàr-al. Al sò repàrt al lauràva sóta quaciadùra in dla scōla par prutéś'r i fiōi di pés grôs.
Gary al lóga la baghéta in dla sò barca, pò 'l dróa 'l sistéma segrét ad cumunicàr dla Megan c'n al fiōl dal presidènt dla Rùsia sò amìg, Dimitri Starodubov (Anton Yelchin), scambiànd sèg dal figùri GIF cun dèntar dal fraś in còdas. 'L insgnànt di dū ragàs al dà acsè apuntamènt a Dimitri in na càbina telefònica par pò rapìr-al. Al piàṅ al sarév anc parfèt s'a n fus par 'l intervènt a 'l ùltim ad Cross e dla Flannigan.
Quànd Gary al tórna in dla sò barca al n cata piò la ragasōla, l'è sparìda. A 'l cap dla pulisìa Ollie McArthur (Dylan Baker) a riva na telefunàda dal rapidōr ch'al dmanda déś migliòṅ ad dòlar in diamànt p'r avér indrē la Megan. Dòp la cunségna dal riscàt, Soneji al s fà viṿ listés a cà 'd Alex e chi lò 'l è custrét a sparàr-ag par diféndar la Jezzie ma 'l capìs anc che 'l insgnànt al n gh intràva gnint c'n al riscàt parchè al n saìva gnanc 'l impòrt precìś dal valōr di diamànt.
Alex al s rénd cònt ch'a gh'è quèl ch'a traśa e 'l taca a 'vér di suspèt su Ben Devine (Billy Burke), agìnt di servìsi segrét ch'in dal dè dal rapimènt dla Megan al n iva minga srâ 'l cansèl par blucàr Soneji prima ch'al scapìs via.