Muimènt Sinc Stéli

Da Wikipedia.

C'l artìcul chè 'l è scrit in Miranduléś Emiliàn

Muimènt Sinc Stéli, 2015
«
Andâ a dar via al cûl!»
(Ślògan dal V-Day dal Setémbar dal 2007)


Al Muimènt Sinc Stéli (MoVimento Cinque Stelle) 'l è un partî pulìtic itagliàṅ che però al preferìs ciamàr-as „libra asuciasiòṅ ad sitadèṅ“. 'L è stâ fundâ al 4 'd Utóbar dal 2009 tgnénd a drē a l'esperìnsa dal muimènt Amìg ad Beppe Grillo, in pē da 'l 2005 e preśentâ a gl'elesiòṅ dal 2008 cun soquànti listi civìchi a Sinc Stéli.

Al muimènt 'l è 'l ùnic òrgan pulìtic arcgnusû uficialmènt da 'l còmic Beppe Grillo, cun lì lò ch'al dà al sò apòǵ a 'l batàji purtàdi avànti in si téma culturài e suciài, par mèś di sò spetàcui teatrài e druànd al blòg ch'al gh'à in sal sit beppegrillo.it a far data dal 2005.

'L è par cal mutìṿ lè ch'i militànt dal muimènt i èṅ anc ciamâ da i giurnài Grilèṅ.

Al sinc stéli dal nóm i èṅ lè par dascórar di sinc téma sentrài p'r al muimènt: àqua pùblica, traspòrt, śvilùp, cunét'r-as insém e ambiènt.

Un punt ad śvòlta p'r al muimènt al gh'è al 14 ad Śugn dal 2007 quànd Beppe Grillo al buta lè l'idéa dal V-Day o Vaffanculo Day (Al dè ad mandàr a dar via al cûl), a sò dita, na via ad mèś fra 'l V-Day dal śbarc in Nurmandìa e V cuma Vindéta, da tgnir-as 'l 8 ad Setémbar p'r arcurdàr che «da 'l 1943 a gnir a 'dès a n è cambiâ gnint. Ajér al rè 'l éra in fuga e la Nasiòṅ a 'l śband».

In Setémbar Grillo al dascór da la piàsa ad Bulógna, una dal duśènt piàsi dal V-Day, e al cata sù al firmi (350.000) par purtàr in Parlamènt tri Léǵ vludi da 'l pòpul:

  • No a i cundanâ in Parlamènt;
  • A 'l màsim dū legiśladùri e pò basta;
  • Elesiòṅ dirèta di parlamentâr, scanślànd i numinâ da i partî.

In dal Nuvémbar dal 2008 Grillo al fà catàr al sò sìmbul in di elesiòṅ p'r i cumûṅ e in dal sità dla nòstra regiòṅ al mucia sù dal 3 al 4 % di vōt.

Al 12 ad Luj Grillo al fà savér ch'al s vōl candidàr a 'l primàri dal Partîd democrâtic ma dū dè dòp al PD al gh diś ad no.

In d'l Utóbar dal 2009 a nas uficialmènt al Muimènt Sinc Stéli ch'al ciàpa al 6% di vōt in di elesiòṅ dla regiòṅ Emégglia-Rumâgna, cun al candidâ presidènt, al bulgnéś Giovanni Favia, elèt cunsiliér a Mòdna.

Al Muimènt al crés incóra a gl'elesiòṅ cumunài dal 6 e 7 ad Maǵ dal 2012, cavànd-gh-la a vìnsar al sìndic in dal cumùṅ ad Sarego cun al 35,20%. Dū stmani dòp, in séguit a i balutàǵ, i s śòntan anc i sìndic ad Cmać, Mira e dla sità ad Pärma dal dòp Pietro Vignali, in du 'l à vins Federico Pizzarotti cun al 60,22% di vōt.

Culegamènt estéran