Mirror - Chi vive in quello specchio?

Da Wikipedia.

C'l artìcul chè 'l è scrit in Miranduléś Emiliàn

The Boogeyman
Mirror - Chi vive in quello specchio?

Grant e la Gillian Gordon in na figùra dal film
Mirror - Chi viṿ in cal spèć là?
1980
Regìa: Ulli Lommel
Scritōr: Ulli Lommel
Atōr: Suzanna LoveRon JamesJohn Carradine
Nicholas LoveRaymond BoydenGillian Gordon
Howard GrantFelicite MorganLlewelyn Thomas
Müsica: Tim Krog
Léngua: Ingléś
Dürä dal film: 85 minüt
Nasiōṅ: Stat Unî


«
Cativèri, vindéti, masamènt e 'l mâł ch'al vèṅ fóra da i cunsèṅ śbragâ 'd un spèć. Sèt an ad daśgràsi.»
(Tagline dal film)


Mirror - Chi vive in quello specchio? (Mirror - Chi viṿ in cal spèć là?) 'l è 'n film ad scarésa girâ in dal 1980 p'r al tedésc Ulli Lommel. 'L è custâ sōl tarśènt-mila dòlar a 'l incìrca e al 'n à fat sù da piò ad trénta-sinc migliòṅ in tut al mónd (quàt'r e mèś in di Stat Unî).

Al gh'à abû anc dū séguit: The Boogeyman 2 dal 1983 e Return of the Boogeyman (cgnusû anc cuma Boogeyman 3) dal 1994.

Sunt

Mént'r ad sira i sò putèṅ Willy (Jay Wright) e la Lacey (Natasha Schiano) i èṅ fóra, sò màdar (Gillian Gordon) la taca a far la purcùsa c'n un śōvan ch'la s è purtàda in cà (Howard Grant). Par far méj la malnéta, la gh fà mét'r in cô un calsét a réda da dóna, cuma se lò al fus un làdar o 'n manìac. I dū amànt i tàcan a baśàr-as in dal divàṅ sénsa far a mènt ch'i putèṅ i i tìnan 'd òć par la fnèstra. Quànd la dóna la s 'n acòrś la s arlìa e 'l óm al liga a lèt cun na lasa Willy par far-'g-la pagàr e pò al diś a la putìna 'd andàr a lèt. Chi lē però la n ubidìs minga e la và a tōr un curtlàs par libràr sò fradèl. Willy al ciàpa 'l curtèl e al và a cupàr, cun sò surèla sèg, 'l óm ch'al s catàva a lèt cun sò màdar. Al masamènt al s véd dimóndi bèṅ in dal spèć ch'a gh'è là.

Vint an dòp la Lacey (Suzanna Love), dvintàda granda e spuśàda c'n un fiōl pìcul da tiràr sù, la viṿ in campàggna insém a i sò sîṅ. Sèg a gh'è anc Willy (Nicholas Love) ch'al n è più bòṅ ad dascórar da quànd 'l à cupâ 'l amànt ad sò màdar. Dal vòlti al lóga anc di curtèi in un casét.

Par paràr via gl'arbgàt ch'la gh'à, la Lacey la dmanda ajùt a 'l dutōr Warren (John Carradine) ch'al gh cunsìlia ad tōr in cà al spèć dla cambra da lèt ad sò màdar. La dóna la 'l và a tōr ma al gh casca par tèra e al sa śbraga in tant cunsèṅ. Lì lē la decìd ad tgnir-al listés, miténd insém tut i pès.

Culegamènt estéran