Mósca sasìna

C'l artìcul chè 'l è scrit in Miranduléś

La Mósca sasìna (nóm sientìfic “Cochliomyia hominivorax”) l'è na mósca parasìta magna-carna dimóndi rabìda ch'l'insfìlsa i sò óṿ in dla pèla di mamìfar e dal bèsti c'n al sànguv cald, specialmènt quànd la naśa di taj o dal fridi, e la gh in mét anc di sintunàr. I bègatèṅ ch'i s fórm'n in dla carna i tàc'n a magnàr-la inśgórd e 'l bèsti dasfurtunàdi, cuma i bóv, i vaṅ in a risć anc ad murìr. La fémna l'è bòna ad far-an da déś a sinc-sènt a la vòlta.

A difarèsa di àt'r insèt sò parènt, cla mósca chè l'è periculóśa parchè la n sarnìs minga dal caróggni o dla mèrda par dar da magnàr a i sò bgòṅ ma di sugèt viṿ, anc 'l óm al gh pōl finìr in mèś^[1]. In na quàlc manéra l'arcòrda la Dermatòbia hóminis e la viṿ in Sud-Amèrica e in Lìbia^[2].

I bêg i sàltan fóra da i óṿ in dal gir 'd vint-quàt'r óri e i tàc'n a magnàr la carna andànd sèmpar più śò faghénd di buś bèi grôs faghénd rivàr acsè di atri móschi. In dal gir dna stmana i vérum i bandónan la frida lasànd-as cascàr par tèra e tacànd la faś ad pupa da sót-tèra. Dòp déś dè 'l insèt al salta fóra esénd dvintâ na mósca.

Nòti

↑ Dóna ingléśa la tórna da 'l Perù cun di bgòṅ dla mósca sasìna in d'l uréć Tutto per Lei, 18 ad Luj dal 2013
↑ A n gh'ém minga timōr dla mósca sasìna La Repubblica, 20 'd Avrìl dal 1990

Àtar prugèt

Wikimedia Commons contiene file multimediali su Mósca sasìna

[1] Dóna ingléśa la tórna da 'l Perù cun di bgòṅ dla mósca sasìna in d'l uréć Tutto per Lei, 18 ad Luj dal 2013

[2] A n gh'ém minga timōr dla mósca sasìna La Repubblica, 20 'd Avrìl dal 1990

[1]

[2]