Mâł dla lumàga

C'l artìcul chè 'l è scrit in Miranduléś

Al Mâł dla lumàga (Impotentia erigendi in latìn, Disfunzione erettile o in manéra minga tant precìśa Impotenza in itagliàṅ) 'l è 'l prubléma ch'i gh'aṅ soquànt óm ch'i n gh la càvan minga a tgnir dûr al cas durànt 'l at sesuàł o anc quànd a n gh'è manéra da far-ag cambiàr gnanc par 'n àtim al sò stat ad fiàp.

Al s ciàma acsè parchè al mâł ch'i patìsan 'l arcòrda dimóndi quél ch'a sucéd quànd a s tóca 'l òć dla lumàga pugiâ insìma a la sò anténa: invéci 'd armàgnar lè, la bèstia la 'l tira indrē tut al vòlti ch'al ciàpa atàc a quèl. A Mòdna a s diś a i putèṅ: „Lumaghèin da 'l an pasê invéci ed cráser 'l è calê“, a Bulógna invéci la “vójja ed lumèga” 'l è pròpria 'l pistulèṅ pìcul.

I èṅ di migliòṅ in tut al mónd i masć ch'i gh'aṅ cal mâł chè. In Itàglia a s pénsa ch'i sìan tri migliòṅ, al 13% a 'l incìrca. 'L è 'n prubléma ch'al crés c'n i an, difàti a 'n 2% ad malâ fra i śōvan fra 18 e 34 an, a s pasa a 'n 48% ólt'r i 70 an. I mutìṿ ch'i daṅ vita a 'l Mâł dla lumàga i pōl'n èsar fìśic (vasculàr, endòcrin, pansa, diabēt, fum, madśìni tòlti) o psiculògic (angùstia 'd prestasiòṅ, prubléma 'd èsar bcâ durànt la gusàda, pinsēr 'd atra natùra, prubléma cun dal dóni bruti fighi o ch'i spùsan dimóndi o ch'a n s và minga 'd acòrd) o anc un misćiùs di dū.

A 'l dè 'd incō a gh'è di fàrmag ch'i pōlan far dvintar dura la béga anc s'la gh'à di prubléma ad cal gènar chè. A s dascór ad madśìni inibidōri dla fosfodiesteràśi (cuma 'l Viagra) o di vaśdilatadōr (cuma 'l Prostaglandìni), ch'i gh pómpan più sangṿ dèntar.

Culegamènt estéran

(IT) L'impotenza in sal sit dla Treccani

Manéri ad dir

(BLG) Vójja ed lumèga:^[1] avér-'g-al cic
(MUD) In dal più bèl, l'èrma la s'è ingargamèda:^[2] quand 'l à piantâ lè sul più bèl
(MUD) Quand a s ingròsa la zócca a se scurta al picàll:^[3] quand la pansa, vgnuda gròsa, l'à fat dvintàr cìc al picòl
(CARPŚ) A gh'è armèś sōl dla roba in spicajòun...: quand tut a piga a bas
(CARPŚ) Damànd la serva di Mariàn, ch'l'al tōś cum i gh'al dàn: a s as cunténta anc ad pòc

Àtar prugèt

Wikiquote contiene citazioni di o su Mâł dla lumàga
Wikimedia Commons contiene file multimediali su Mâł dla lumàga

Referènsi

↑ (BLG) e (IT) Dizionario Italiano - Bolognese, ed. Vallardi, Milàṅ 2012.
↑ (MUD) e (IT) A Modena si dice(va) così, 'd Umbèrt Borêl, Fràra, 2016.
↑ (MUD) e (IT) "EXPOL magnêr a Mòdna?!" ad Sander Bellèi, Frara, 2015, pâǵ 60.

[1] (BLG) e (IT) Dizionario Italiano - Bolognese, ed. Vallardi, Milàṅ 2012.

[2] (MUD) e (IT) A Modena si dice(va) così, 'd Umbèrt Borêl, Fràra, 2016.

[3] (MUD) e (IT) "EXPOL magnêr a Mòdna?!" ad Sander Bellèi, Frara, 2015, pâǵ 60.

[1]

[2]

[3]