Lo squartatore di Los Angeles
|
C'l artìcul chè 'l è scrit in
Miranduléś |
 The Toolbox Murders
| ||
| Lo squartatore di Los Angeles | ||
 Cameron Mitchell in na figùra dal film | ||
| Al scvartadōr ad Los Angeles 1978 | ||
|---|---|---|
| Regìa: Dennis Donnelly | ||
| Scritōr: Neva Friedenn Robert Easter • Ann Kindberg | ||
| Atōr: Cameron Mitchell • Tim Donnelly • Betty Cole Wesley Eureo • Don Diamond • Nicolas Beauvy Kelly Nichols • Pamelyn Ferdin • Marciee Drake | ||
| Müsica: George Deaton | ||
| Léngua: Ingléś | ||
| Dürä dal film: 93 minüt | ||
| Nasiōṅ: Stat Unî | ||
Lo squartatore di Los Angeles (Al scvartadōr ad Los Angeles) 'l è 'n film ad scarésa dal 1978 ad Dennis Donnelly.
In dal 2003 al regìsta Tobe Hooper 'l à girâ 'n arfacimènt ad cla pelìcula chè ciamâ La casa dei massacri.
Sunt
'N óm vistî 'd négar, pasànd p'r al stradi 'd Los Angeles, al véd na ragàsa ciamàda Kathy far 'n incidènt in màchina e murìr. Subìt dòp chi lò al và a cà dla sgnōra Andrews (Faith McSwain), na dóna puòsa ch'la stà in un cundumìni 'd pruprietà ad Vance Kingsley (Cameron Mitchell), e al la masa druànd un tràpan tirâ fóra da la sò caséta di atrés, pò al s mét in cô 'n pasamuntàgna prima 'd andàr via.
Al sergînt Cameron (Don Diamond) e 'l detective Jamison (Tim Donnelly) i tàc'n a far dgl'indàśin ma 'l manìac al culpìs incóra, prima masànd la Debbie (Marciee Drake) cun na martlìna e pò la pòvra Maria (Evelyn Guerrero), ch'la pasàva da 'd lè, c'n un casavîd. Al dè dòp 'l è 'l tùran dla Dee Ann (Kelly Nichols), cupàda cun na pistòla spara-ciòld parchè la fava tròp la purcùsa in dla sò vasca da bagn esénd ch'la s masturbàva méntar la s lavàva in dla sćiùma. Cla sira lè 'l óm al rapìs la Laurie Ballard (Pamelyn Ferdin), na ragasōla 'd quìnd'ś an ch'la viṿ in cal quartēr lè in dla val ad San Fernànd insém a sò màdar Joanne (Aneta Corsaut) e a sò fradèl Joey (Nicolas Beauvy).
Joey al s dà da far da par lò par pascàr sò surèla anc parchè Jamison al n créd briśa ch'la sia stada rapìda. Dand 'n òć a 'n apartamènt 'd una dal vitmi, al ragàs al gh cata dèntar Kent (Wesley Eure), anvōd dal sgnōr Kingsley e cuśèṅ dla Kathy esénd lē sò fiōla. Kent al s cata lè par cònt ad sò sîṅ par pulìr i mur e i tapē da tut al sànguv stramnâ in gir acsè da psēr dar in afìt gl'apartamènt lasâ lìbar.
Joey al vîṅ a savēr ch'al sasèṅ 'l è Vance in parsòna dòp avēr catâ i sò atrés da marangòṅ in dal sò garàǵ ma purtròp al n fà minga in tèmp a liberàr la Laurie, tgnuda ligàda a lèt in dla cambra dla Kathy e tratàda cuma s'la fus lē dabòṅ da 'l manìac, parchè Kent 'l al masa dand-ag fōg.