Kim Kardashian
|
C'l artìcul chè 'l è scrit in
Miranduléś |
La Kimberly Noel Kardashian dita "Kim", cgnusùda méj cuma Kim Kardashian mo anc cuma Kimberly Kardashian West (Los Angeles, 21 'd Utóbar dal 1980) l'è na showgirl, 'n persunàǵ televiśìṿ, n'atōra, na “socialite”, na mudèla, na stilìsta e n'imprendidōra americàna.
La Kim l'è amìga dla Paris Hilton dòp ch'la s è giustàda sèg[1]. L'à recitâ par Ben Stiller e in Disaster Movie e in soquànt telefìlm cuma CSI: NY ('n epiśòdi), 90210 ('n epiśòdi) e Punk'd ('n epiśòdi).
L'à muciâ sù dimóndi migliòṅ ad dòlar tulénd part a di reality show a la televiśiòṅ cuma „A 'l pas c'n i Kardashian“, „Al surèli Kardashian a New York“ e „Al surèli Kardashian a Miami“. L'à anc fat vgnir fóra di sò parfùm e l'è la pruprietària dal marc ad famìja DASH.
La s è spuśàda tri vòlti (cun Damon Thomas in dal 2000, cun Kris Humphries in dal 2011 e c'n al rapper, èx dl'Amber Rose, Kanye West in dal 2014) e la gh'à na fiōla e 'n fiōl suo, più atri dū, la Chicago e la Psalm West, abùdi da dal màd'r in prèst.
Biugrafìa
La Kim la nas in Califòrgna da 'l avucàt 'd urìgini arméni ch'l'à fat asòlvar 'l atōr O.J. Simpson, Robert Kardashian. La gh'à dū surèli, la Kourtney e la Khloé, 'n fradèl, Robert jr, e dū surèli abùdi da sò màdar Kris Jenner cun 'n àt'r óm, dòp ch'la s éra divìśa da sò pàdar, la Kendall Jenner e la Kylie Jenner.
In dal 2007 la s fà tōr śò nuda su Playboy[2] e, sèmp'r in c'l an lè, la Vivid Entertainments la fà vgnir fóra 'n sò vìddeo pòran dal 2003 fat in cà c'n al cantànt Ray J, fradèl dla Brandy, che pò in séguit 'l è anc andâ in a risć ad finìr bruśâ[3]. In cla manéra chè la s fà cgnósar dimóndi e al sò sucès al crés inóra tulénd part a di prugràma televiśìṿ baśâ su la sò vita e qvéla dla sò famìja.
In dal 2008 la gh'à na part in dla cumèdia ad cretinìśia Disaster Movie (Diśàstar Film) ad Jason Friedberg e 'd Aaron Seltzer e in soquànt telefìlm. La tōś anc part a la versiòṅ americàna dal prugràma „Balànd c'n al Stéli“. In dal 2010 la canta na cansòṅ da 'l tìtul Jam (Turn It Up).
In dal 2012, Forbes al mét par la prima vòlta la Kardashian in dla lista di sènt persunàǵ famóś più putènt a 'l mónd (la Kim l'è sètma cun daśdòt migliòṅ ad dòlar mis in bisàca in 'n an).
In dal Śugn dal 2014, la Kardashian la fà vgnir fóra 'n śōg vìddeo p'r iPhone e p'r Android ciamâ “Kim Kardashian: Hollywood”. Al scòp dal śōg 'l è qvél ad dvintàr na stéla a Hollywood o almànc na velìna. La rivìsta Paper la la mét in cupertìna e a s véd lē ch'la gh la cava a tgnir sù 'n bicér ad champagne insìma a 'l sò cûl. La Kim la mét subìt cla foto lè su 'l sò utènt ad Twitter dgénd «E pò i dìśan ch'a n gh'ò minga dal talènt, pruâ vuàtar a tgnir un bicér pîṅ ad champagne ch'al staga sù su 'l vòstar dadrē s'a sî bòṅ»[4]. 'L an dòp a vèṅ fata na sò statṿa a 'l “Madame Tussauds” ad Lóndra ch'l'è drē a far-'s un selfie in manéra ch'la gint la pòsa far na foto cun lē davśèṅ[5].
Quànd in dal 2015 la cantànta Sinead O'Connor la véd la sò ghigna in sla cupertìna dla rivìsta “Rolling Stones” la gh dà adòs in sla sò paśna Facebook scrivénd «Mo csa gh fà-la cla ninéta chè su “Rolling Stone”? La mùśica incō l'è mòrta uficialmènt. Ninsòṅ a psiva pinsàr ch'a cupàr-la a sarév stâ pròpria “Rolling Stone”. Simon Cowell e Louis Walsh i n gh'aràṅ piò da tōr-as la cólpa. Bob Dylan al gh'à da èsar pîṅ ad sèns ad schiva» [6].
Al 2 'd Utóbar dal 2016, méntar la s catàva a Parì par la stmana dla mòda, l'è stada vitma dna rapìna in dal sò apartamènt da part dna banda 'd sinc delinquènt ch'i l'aṅ ligàda e mis al bàv'r adòs prima 'd purtàr-ag via déś migliòṅ in prédi presióśi.
In dal 2017 la mùcia sù quatórdas migliòṅ e quàt'r ad dòlar in dū óri vindénd in internet al sò kid p'r al contouring ciamâ KKW Beauty.
Filmugrafìa
- 2008 - Disaster Movie, regìa ad Jason Friedberg e 'd Aaron Seltzer
- 2009 - Alligator Boots, regìa ad Tom Stern - FilmTV
- 2009 - Ragazze da sballo (Deep in the Valley), regìa ad Christian Forte
- 2013 - Temptation: The Marriage Counselor, regìa ad Tyler Perry
- 2016 - Zoolander 2, regìa ad Ben Stiller
- 2018 - Ocean's 8, regìa ad Gary Ross
Culegamènt estéran
Nòti
- ↑ Da la Paris Hilton a la Kylie Jenner: Nudi su Paper cuma la Kim Kardashian Melty, 2 ad Dicémbar dal 2015
- ↑ La Kim Kardashian la s arlìa p'r al foto mai publicàdi prima ad Playboy Focus, 10 ad Setémbar dal 2010
- ↑ Al vìddeo hard dla Kim Kardashian al s è salvâ da 'l fiàmi Today, 28 ad Favràr dal 2013
- ↑ La Kim Kardashian la sfida la gravità: al bicér al stà sù da par lò su 'l sò lâ B Today, 12 ad Nuvémbar dal 2014
- ↑ Kim Kardashian, statṿa cun selfie a 'l Madame Tussauds Gossip Blog, 10 ad Luj dal 2015
- ↑ “Cuśa gh fà-la cla nimàla chè su Rolling Stone?” Prima on Line, 15 ad Luj dal 2015
Àtar prugèt
Wikiquote contiene citazioni di o su Kim Kardashian
Wikimedia Commons contiene file multimediali su Kim Kardashian
