Francesco Griffo

Da Wikipedia.
C'l artìcul chè 'l è scrit in Carpśàn Emiliàn
Al cuminciamèint dal De Aetna stampê in dal 1495 da 'l Manùsi cui caràter dal Griffo

Fransèsc Griffo o Griffi, anc cgnusû c'ma Fransèsc ed Bulògna (Bulògna, vers al 1450 – intòr'n a 'l 1518) 'l era stê 'n tipòraf e disgnadōr ed caràter tipogràfic itagliàn. In dal 1475 'l era a lavurèr a Pèdva e 'l fèva di caràter gòtic p'r al tipògraf Pierre Maufer. In dal 1480 'l andèva invéci a lavurèr in Venésia. Al Griffo 'l a'rèv forgê sucesivamèint, p'r al Manùsi soquànt tip ed carâter român tònd e 'd quī grèc; però masimamèint al dvintèva famōś p'r al sô caràter cursìv aldèin, anca ciamê itàlic, da lò invintê e druê per la prima volta in dal Virgìli dl'edisiòun aldèina dal 1501 e cupiê subìt anca fóra da l'Itâglia: infàti cal caràter chè al permetìva a 'l stampadōr ed fèr stèr 'na quantitê piò granda ed lèttri anca ind un spàsi piò cìc.

I caràter tipogrâfic itàlic forgê dal Griffo

Al Griffo al custruirà anca di carâter p'r al Gershon Soncino, 'l Utaviàṅ Petrucci, al Bernardèin Stagnino e 'l Filìp Giunti. Turnê a Bulògna vèrs al 1515, al perfesiunèva i sô caràter cursìv e 'l publichèva in dal 1516-17 dal bèli edisiòun ind un furmê cìc, c'ma: 'l Canzoniere e i Trionfi 'dal Petrarca, l'Arcadia dal Sannazzaro, ai Asolani 'dal Bembo, al Labirinto d'amore 'dal Boccaccio, ai Epistolae familiares dal Ciceròun e 'l Dictorum et factorum memorabilium dal Valèri Màsim.

Ed lùng ai sécol ch'a vgnìva dòp, i caràter che 'l Griffo 'l ìva dissgnê i gh'aràn 'na granda e lunga influèinsa in dl'èrt ed la tipografìa.

Colegamèint estèren