¡Ahora caigo!
|
C'l artìcul chè 'l è scrit in
Miranduléś |
¡Ahora caigo! (Adès a casc śò!) 'l è un śóg televiśìṿ cundót par Arturo Valls traśmìs par la televiśiòṅ spagnóla Antena 3 a partìr dal 6 ad Luj dal 2011 e al tîṅ a drē a na pinsàda iśraeiliàna ciamàda Lauf al Hamiliyon (לעוף על המיליון in dla sò léngua).
Al và in ónda tut i dè lavuratìṿ a siē e mèś dla sira (tulénd al nóm ad ¡Ahora caigo! diario) o anc ad sira tard par dal puntàdi speciàli (cuma quéla cun i cuncurènt vistî cun di custùm regiunài o cun di cuncurènt famóś o par la puntàda ad Nadâl).
Cum al funsiòna
Al cuncurènt principàŀ, ch'al s cata a 'l sèntar dal studi in pē in sn'arbàlta, par vìnsar al gh'à da far fóra òṅ a la vòlta déś aversàri ch'i èṅ tut 'd intór'n a lò, anca lōr pugiâ in sn'arbàlta. Al cuncurènt al in sarnìs òṅ e acsè a taca un duèl. Al cundutōr al fà dal dmandi a tùran, dand na trasa dla rispòsta faghénd-ag védar la lunghésa dla sulusiòṅ e dand anc soquànti létri (o nùmar) dasquaciàdi e trénta secónd par rispóndar. A n è mia impurtànt s'al cuncurènt al fà di śbali, basta ch'al dappia la rispòsta in tèmp (quànd i càlan sinc secónd a la fiṅ, a partìs na siréna par mét'r-ag présia). Se 'l al fà, a vèṅ fata n'atra dmanda a c'l àtar, fiṅ tant chè òṅ di dū al n sà briśa la rispòsta. Quànd a sucèd, l'arbalta la s vèra tut 'd un cólp e al cuncurènt al casca śò a péś mòrt (da lè al tìtul dla traśmisiòṅ).
A cal punt lè a s dasquàcia al prèmi lugâ ad sóta dna munéda in frònt a 'l cuncurènt a 'l estèran (da un euro a sinc-mil'euro). S'l à vins lò, al s pòrta a cà al prèmi e al śóg al finìs lè. Invéci, s'l è stâ c'l àtar a vìnsar, al śóg al và avànti e al cuncurènt sentràl al mùcia sù c'l impòrt lè.
A 'l inìsi dal śóg al cuncurènt prinsipàl al pōl cuntàr su tri bòṅ (da lōr ciamâ comodines) ch'al pōl druàr quànd al s cata a mâŀ partî: śugànd-i al pōl pasàr la dmanda a c'l àtar ch'l è custrét a rispóndar p'r a n finìr minga śò. Finî i bòṅ, anc al cuncurènt a 'l sèntar 'l è custrét a rispónd'r a tut.
Quànd sèt di cuncurènt laterài i aṅ pardû sparénd dal śóg, al cundutōr al dà 'n àtar bòṅ a quél sentràl e al gh dmanda s'al vōl turnàr a cà purtànd-as sèg metà di prèmi muciâ sù in cal mèntar o s'al vōl śugàr incóra andànd in a risć ad pèrdar incòsa.
S'al decìd ad cuntinuàr, a partìs n'atra sfida e, se anc 'l utàṿ aversàri al casca śò, al cuncurènt al pōl andàr a cà cun tut quél mis da part o cuntinuàr incóra. Stésa ròba cun la sfida nùmar nóṿ.
Par vìnsar al prèmi più grand (100.000 euro o 200.000 euro in dal puntàdi speciàli) invéci a gh'è da far-i fóra tut. Se par daśgràsia al pèrd, lì lò al và a cà cun al bisàchi vódi e i prèmi mis da part i vànan a 'l ùltim cuncurènt ch'al 'l à batû.
Al prugràma 'l è traśmìs anc in àtar pòst in dal mónd cuma i Stat Unî (là al tōś al nóm ad Who's Still Standing?), Ungarìa (Maradj talpon!), Itàglia (Caduta libera) e Braśìl (TBA).