Vizi privati, pubbliche virtù
|
C'l artìcul chè 'l è scrit in
Miranduléś |
 Vizi privati, pubbliche virtù
| ||
 Balázsovits e Branciaroli in na figùra dal film | ||
| Visi privâ, virtù pùblichi 1976 | ||
|---|---|---|
| Regìa: Miklós Jancsó | ||
| Scritōr: Miklós Jancsó • Giovanna Gagliardo | ||
| Atōr: Lajos Balázsovits • Franco Branciaroli Teresa Ann Savoy • Laura Betti • Umberto Silva Pamela Villoresi • Ivica Pajer • Ilona Staller | ||
| Müsica: Francesco De Masi | ||
| Léngua: Itagliàṅ • Tedésc Francéś • Ungheréś • Ingléś | ||
| Dürä dal film: 120 minüt | ||
| Nasiōṅ: Itàglia • Juguślàvia | ||
Vizi privati, pubbliche virtù (Visi privâ, virtù pùblichi) 'l è 'n film eròtic e dramàtic itagliàṅ e juguślàṿ dal 1976 ad Miklós Jancsó, preśentâ a 'l 29śum Fèstival ad Cannes in du 'l è stâ numinâ par la Palma 'd Òr. In na part piculìna a s véd anc l'Ilona Staller.
'L è stâ girâ in un castèl dal Setsènt a Vinica in Cruàsia e tut gl'atōr i aṅ recitâ in dla sò léngua par pò ès'r ardupiâ in séguit. La pelìcula l'è stada sequestràda par dū vòlti in Itàglia par purcarìi e la senegiadōra, la Giovanna Gagliardo, insém a 'l regìsta, i èṅ anc stâ mandâ a prucès.
Sunt
Al prìnsip Rudolf (Lajos Balázsovits) 'l è dimóndi arvèrs in di cunfrònt ad sò pàdar 'l imperadōr. Tant par tacàr al mét in pē un piàṅ par far-al fóra, ma al n gh la cava mia, pò al n in vōl savér ad far di fiōi cun sò mujér, una ch'la pònsa sèmp'r e ch'la dórum c'n al mudàndi imperiàli adòs. Lò al pasa 'l sò tèmp a far al malnét insém a la sò dóna (che però la gh'à 'l pistulèṅ), la Mary (Teresa Ann Savoy), e anc c'n i sò fradelàstar, la Sofia (Pamela Villoresi) e al sò muróś che lò al vōl far duca (Franco Branciaroli). 'L imperadōr al sèra tut dū i òć ma sōl in fiṅ tant che lò al s lìmita a far al visióś sénsa dar scànd'l in pùblic.
Par dar-ag cóntar, Rudolf al decìd ad far na fèsta invidànd di nòbii e i cumpunènt 'd un cîrc, pò al gh fà śuntàr in dal vèṅ dla pólvra śala par far muntàr in lōr la cretinìśia e la vója ad far i purcùs. Dòp ch'i s èṅ cavâ śò dal tut, al gh fà dal foto da far véd'r in gir par far vargugnàr sò pàdar anc s'al sà, e la gh 'l arcòrd' anc la sò badànta, la Therese (Laura Betti), ch'al và in a risć 'd èsar cupâ.