Vedo nudo
|
C'l artìcul chè 'l è scrit in
Miranduléś |
 Vedo nudo
| ||
 La Sylva Koscina in na figùra dal film | ||
| A véd nûd 1969 | ||
|---|---|---|
| Regìa: Dino Risi | ||
| Scritōr: Ruggero Maccari • Jaja Fiastri Bernardino Zapponi • Dino Risi • Fabio Carpi | ||
| Atōr: Nino Manfredi • Enrico Maria Salerno Sylva Koscina • John Karlsen • Umberto D'Orsi Marcello Prando • Daniela Giordano • Lia Tanzi Véronique Vendell • Jimmy il Fenomeno Nerina Montagnani • Domenico Ravenna | ||
| Müsica: Armando Trovajoli | ||
| Léngua: Itagliàṅ | ||
| Dürä dal film: 117 minüt | ||
| Nasiōṅ: Itàglia | ||
Vedo nudo (A véd nûd) l'è na cumèdia su 'l sès a epiśòdi itagliàna dal 1969 ad Dino Risi.
Al prutagunìsta Nino Manfredi 'l à vins un Dàvid ad Dunatèl par cla pelìcula chè.
Sunt
Prim epiśòdi: La diva
L'atōra Sylva Koscina (Sylva Koscina), méntar 'l è drē a turnàr a cà in màchina dòp un servìsi futugràfic, vdéd par strada 'n óm frî dòp 'n incidènt, la 'l fà muntàr sù par purtàr-'l a 'l uśdàł in présia. Quànd l'è là, tut al persuàł sanitàri al l'arcgnós. Mèdag e infarmēr i mòlan lè incòsa p'r andàr a far dal fóto, par védar-la e par far-as far di autógrafar. Anc al prufesōr Federico Cacopardo (Nino Manfredi) al śmét ad lauràr par dascórar sèg dal rumànś ch'l è drē a scrìvar. In cal sapèl lè, ninsòṅ a fà a mènt a 'l pòvar pasiènt che acsè al mōr.
Secónd epiśòdi: Udienza a porte chiuse
Davànti a 'n giùdas a gh'è gh'è 'l cuntadèṅ Angelo Perfili (Nino Manfredi), denunsiâ da na vècia (Nerina Montagnani) parchè lò al s è parmìs ad gusàr na sò galìna. 'L óm al próa a difénd'r-as dgénd ch'l'è stada la bèstia a far-ag di avance e, esénd ch'l éra dimóndi ch'al n fava minga sès, al n à minga psû reśìst'r-ag. Al giùdas al mét in cònt la pruvucasiòṅ però 'l al cundàna listés a riśarcìr al dan cun sincmìla franc. Turnànd a cà, Angelo al fà a mènt che da la sésta in du la s cata, la galìna la cuntìnua incóra a pruvucàr-al.
Tèrs epiśòdi: Ornella
Ercole (Nino Manfredi), impiegâ dal pòsti, al gh'à 'n segrét: quànd 'l è da par lò al s vistìs da dóna. Da tèmp al s è mis a scrìvar dal létri a 'n raśunēr 'd Turèṅ, Carlo Alberto Ribaudo (Enrico Maria Salerno), firmànd-as Ornella. Un dè, a 'l impruvìś, al piemuntéś al decìd ad vgnir a cgnós'r-l' a Róma. Ercole al gh vèra 'l us e, in imbaràs par la situasiòṅ, al gh diś 'd ès'r al fradèl dl’Ornella e che chi lē la n gh'è mia parchè l'è andàda a catàr na sò sîna ch'la n stava minga tant bèṅ. Avénd pardû 'l aparéć, Carlo Alberto 'l armàgn a durmìr da lò. Quànd Ercole la gh dà la bònanòt, lò al gh rispónd «Bònanòt Ornella!».
Quàrt epiśòdi: Guardone
'N óm mèś òrub e mèś nûd (Nino Manfredi), cun di uciài cun dal lénti ch'i pàran di cûi ad butìglia, al fà a mènt par la fnèstra ch'in dal palàs lè darènt a gh'è na dóna ch'l'è drē a cavàr-as śò. Mo l'è sōl n'iluśiòṅ, un śōg ad spèć e 'd riflès, la figùra 'd fémna ch'l iva vist a dir dabòṅ 'l éra lò ch'l éra drē a cavàr-as via i vistî p'r andàr a lèt.
Quìnt epiśòdi: L'ultima vergine
La Manuela (Véronique Vendell) l'è na śuvnòta 'd Spulēt c'n al terōr 'd un sasèṅ manìag ch'al s è mis a cupàr da 'l sò bandi. Na matìna a sòna a cà sua un tisi ch'al tartàja (Nino Manfredi) ch'al diś 'd ès'r un tècnig di telèfun ch'al gh'à da far dal giustadùri a 'l sò aparéć. Esénd ch'al sumìlia dimóndi a la descrisiòṅ dal sasèṅ fata da i giurnài, a la ragàsa a gh vîṅ un cōlp par la paùra. Par pruàr a salvàr-as, chi lē la taca a dir ad sè a tut, finénd anc par cuncédar-'s a lèt da vìrgin, cum l'iva bèla fat na vitma dal killer (Edda Ferronao) par scampàr. Soquànti óri dòp, cun 'l uperàj ch'l è andâ via sénsa far-ag dal mâł, la Manuela la sènt a 'l nutisiàri ch'la pulìsia l'à ciapâ 'l manìag, qvél véra minga 'l tècnig. Al prubléma par lē 'l è ch'in cal méntar la s è inamuràda dabòṅ 'd lò.
Sèst epiśòdi: Motrice mia!
Maurizio (Nino Manfredi) 'l è spuśâ cun na tedésca ciamàda Inge (Lisa Halvorsen). Al rapòrt fra i dū al n và minga tant bèṅ parchè 'l óm al s è mis a tradìr-la c'n un trêṅ. Chi lò al gh'à 'n feticìśum particulàr e 'l cata 'l gudiōl sōl armagnénd culgâ su i binàri quànd un trêṅ al gh pasa insìma.
Sètim epiśòdi: Vedo nudo
Nanni (Nino Manfredi), agìnt publisitàri, al gh'à 'n prubléma. A fòrsa 'd butàr 'l òć su dal figùri malnéti ad dóni sénsa vistî adòs, adès al gh'à di alucisasiòṅ ch'i gh fànan védar tut al dóni nûdi quànd al l'incróśa o quànd al li véd in televiśiòṅ. Par curàr-as, al và in na clìnica in Śvisra in dua 'l tîṅ adrē a la terapìa dal sò psicòlug (John Karlsen). Finìda la cura e turnâ a lauràr, Nanni al và a la fnèstra dal sò ufìsi e 'l véd 'n óm andàr fóra da 'l palàs. Chi lò 'l è tut nûd, ma minga sōl lò, anc tut chi àtar masć.