Un tranquillo week-end di paura

Da Wikipedia.

C'l artìcul chè 'l è scrit in Miranduléś Emiliàn

Deliverance
Un tranquillo week-end di paura

Na figùra dal film
Un tranquìl fiṅ 'd stmana 'd paùra
1972
Regìa: John Boorman
Scritōr: James Dickey
Atōr: Jon VoightBurt ReynoldsNed Beatty
Ronny CoxSeamon GlassRandall Deal
Bill McKinneyJames DickeyBilly Redden
Müsica: Arthur Smith
Léngua: Ingléś
Dürä dal film: 109 minüt
Nasiōṅ: Stat Unî


«
Qvést chè 'l è 'l fiṅ 'd stmana in dua lōr i n śōgan minga a gòlf.»
(Tagline dal film)


Un tranquillo week-end di paura (Un tranquìl fiṅ 'd stmana 'd paùra) 'l è 'n film dramàtic dal 1972 ad John Boorman trat da 'l rumànś In dua al pòrta 'l fiùm ad James Dickey.

La pelìcula l'è stada numinàda par tri Prèmi Òscar e a soquànt Golden Globe faghénd sù da piò ad quarànta-siē migliòṅ ad dòlar esénd-an custàda sōl dū. In dal 2008 i americàṅ i aṅ decìś ad tgnìr-al dacàt in dla bibliutéca dal cungrès di Stat Unî.

Sunt

Ed Gentry (Jon Voight), Lewis Medlock (Burt Reynolds), Bobby Trippe (Ned Beatty) e Drew Ballinger (Ronny Cox) i èṅ quàt'r amìg, sitadèṅ 'd Atlànta, ch'i decìdan ad far un quèl ad nóṿ pasànd un fiṅ 'd stmana in mèś a la natùra, in di bòsc di mònt Apalàc, vgnénd śò p'r al fiùm Cahulawassee in Geòrgia.

I quàt'r i èṅ dimóndi difarènt in dal caràtar. Lewis 'l è al più śmargiàs dal grup e 'l è persuàś dabòṅ ch'la siviltà urbàna la purtarà prèst al gèn'r umàṅ a la distrusiòṅ e alóra par lò a gh sarés d'inśgnàr-'s a vìv'r in mèś a la natùra salvàdga. Al gh'à sèg 'n arc nég'r e dal fréci anc s'l è dimóndi tèmp ch'al n i dróa minga. Drew 'l è 'n óm cun di prinsìpi bòṅ, inteligìnt e ch'al tiṅ adrē a la mùśica e a la giustìsia. Bobby invéci al gh'à na cria ad minciòṅ e al và drit in dal questiòṅ ma al n è briśa catìṿ, sōl un pôc budlòṅ. Da 'l cant suo Ed 'l è 'n bunàri, bòṅ 'd adatàr-as a la perfesiòṅ in tut al situasiòṅ ch'i gh s pàran cóntar.

Rivâ a na stasiòṅ ad sarvìsi, i turìsta i dmànd'n a 'n vèć s'a gh'è qualchidòṅ ch'al prév far un lavursèṅ par lōr. In cal méntar Drew al véd un baghét autìstic ch'al strinś in dal maṅ un banjo e, par tacàr butòṅ, al s mét a sunàr la sò chitàra, sprand ch'al ragàs al gh vaga a drē, cum a sucéd pò dabòṅ. Da n'atra banda Lewis e Ed i s métan 'd acòrd cun un mecànic ch'al s ciàma Griner (Seamon Glass) par purtàr insém a sò fradèl (Randall Deal) la sò màchina più a val.

I quàtar i tàc'n a 'ndàr śò p'r al fiùm cun na canòa, pasànd anc na cascàda, e pò i càt'n un pòst par pasàr la nòt. Prima ad culgàr-as i partìsan cun al dascórar ad questiòṅ filuśòfichi cum al fat ch'la siviltà mudèrna la sia lè lè par dasfàr-as e in sal fat ch'in dal furèsti a gh sia quèl ch'l óm mudéran 'l à pardû.

Al dè dòp Ed, ch'al s éra alvâ ad bonóra, al próa a masàr un dant cun 'l arc ma al n gh la cava mia parchè al n è minga bòṅ ad tgnir-al stric cum a ś dév. Méntar Lewis e Drew i tōśan la canòa par far un gir lè 'd intóran, Ed e Bobby i vaṅ a pés. Tut 'd un trat i s pàran davànti dū bruti ghigni ch'i tàc'n a far di dascōrs strâṅ e a dvintàr śgarbâ, anc parchè i gh'aṅ un sćiòp sèg. Mént'r òṅ, cun la ganàsa e i dènt tut dasfurmâ, al ligâ atàc a 'n àrbul Ed, c'l àtar al cava śò Bobby e pò al gh al mét in dal cûl, «cuma a 'n bèl ninét». Finî cun quàl là, al viulentadōr al s davśìna a Ed par far-as far un buchèṅ ma pròpria in cal mumènt a riva lè Lewis ch'al 'l insfìlsa cun na frécia, in dla schina e in dal pèt, cupànd-al. C'l àtar al scapa via, cun Drew ch'al gh cur adrē. Al grup al n sà mia s'a sia 'l caś ad saplìr-al o no, se dir-'l a la pulisìa, parchè a s pōl dar ch'i vàg'n in di guàj p'r al fat 'd avér masâ òṅ. La vacànsa in mèś a la natùra l'è drē a dvintàr 'n arbgàt par lōr.

Culegamènt estéran