Un pesce di nome Wanda
|
C'l artìcul chè 'l è scrit in
Miranduléś |
 A Fish Called Wanda
| ||
| Un pesce di nome Wanda | ||
 John Cleese in na figùra dal film | ||
| Un pés ad nóm Wanda 1988 | ||
|---|---|---|
| Regìa: Charles Crichton | ||
| Scritōr: John Cleese • Charles Crichton | ||
| Atōr: John Cleese • Jamie Lee Curtis • Kevin Kline Michael Palin • Maria Aitken • Tom Georgeson Stephen Fry • Patricia Hayes • Cynthia Cleese | ||
| Müsica: John Du Prez • Gioacchino Rossini | ||
| Léngua: Ingléś • Itagliàn • Rus | ||
| Dürä dal film: 108 minüt | ||
| Nasiōṅ: Régn Unî • Stat Unî | ||
Un pesce di nome Wanda (Un pés ad nóm Wanda) 'l è na cumèdia ingléśa e americàna dal 1988 ad Charles Crichton ch'l'è stada misa a 'l 39śum pòst dla clasìfica di sènt fim britànic più bèi dal vintéśum sècul da la British Film Institute. In dal 2000 invéci qvéi d'l American Film Institute i 'l aṅ cunsiderâ una dal sènt cumèdi più bèli ad sèmpar (21śum pòst).
Par cal film chè Kevin Kline, ch'al fà la part 'd Otto West, 'l à ciapâ al Prèmi Òscar cuma atōr minga prutagunìsta. Chi lò in dal film al dascór in itagliàn par far cascàr a i sò pē la Jamie Lee Curtis dgénd di quèi sénsa sèns cuma Benito Mussolini, Fontana di Trevi o Ossobuco alla milanese. A la dmanda dla Curtis se lò al fus 'n itagliàṅ dabòṅ, lò al gh rispónd „Yes, Otto means "eight" in Italian“ (Sè, Otto a vōl dir "òt" in Itagliàṅ). In dla versiòṅ itagliàna dal film, a séguit dal dupiàǵ, chi lò al dascór invéci in spagnōl.
In dal film i recìt'n anc John Cleese e Michael Palin di Monty Python. Cleese, ch'in dal film al fà la part 'd Archie Leach, nóm in cumùn ad Cary Grant, 'l à purtâ a cà 'l Prèmi BAFTA.
Al film 'l à muciâ sù da piò ad ssanta-dū migliòṅ ad dòlar a i butghèṅ. In dal 1996 qvéi dl'Universal Pictures i aṅ mis insém incóra al cast ad cla pelìcula chè, dand vita a Creature selvagge che però 'l è stâ 'n flòp.
Sunt
Lóndra. Al criminàl George Thomason (Tom Georgeson) al mét in pē un piàṅ par rubàr di presiōś insém a 'l sò bras dèstar Ken Pile (Michael Palin), òṅ ch'al vōl bèṅ a 'l bèsti ('l à pardû la tèsta p'r un pés ciamâ Wanda) e ch'al gh'à al difèt ad tartajàr. I gh dànan na maṅ anc la sò amànta Wanda Gershwitz (Jamie Lee Curtis) e al fradèl ad chi lē Otto West, ch'al sà druàr i sćiòp e al pistòli e ch'al s créd 'n inteletuàl p'r avér lèt di lìbar ad Friedrich Nietzsche quànd invéci 'l è sōl un minciòṅ.
Al cólp al và a ségn ma la Wanda e Otto, ch'i èṅ di amànt e minga di fradèi, i vrév'n incastràr George par tgnir-'s incòsa lōr ma quàl là, finî in cal mént'r in parśòṅ, 'l iva fat in tèmp a lugàr la rubarìa da n'atra banda. A difénd'r-al, spitànd al prucès, a gh pénsa 'l avucàt Archie Leach (John Cleese).
George al dà 'l incàrag a Ken ad cupàr na vècia ch'la prév testimuniàr cóntar 'd lò méntar la Wanda la próa a far la daśnumióśa sèg par far-as dir al pòst in du i èṅ stâ purtâ i giujèi. Ma Otto, par via dla sò geluśìa, al manda p'r ària i piàṅ dla Wanda ad purtàr-'s a lèt Archie ma pò al gh la cava listés a far-as dir da Ken al nascundìli, 'l aerupòrt 'd Heathrow.