Tutto quello che avreste voluto sapere sul sesso* (*ma non avete mai osato chiedere)

Da Wikipedia.

C'l artìcul chè 'l è scrit in Miranduléś Emiliàn

Everything you always
wanted to know about sex*
(*but were afraid to ask)
Tutto quello che avreste voluto sapere sul sesso*
(*ma non avete mai osato chiedere)

Gene Wilder e la pégra Daisy in na figùra dal film
Tut qvél ch'a 'rî sèmpar vlû savēr dal sès*
(*ma ch'a n î mai abû 'l curàǵ ad dmandàr)

1972
Regìa: Woody Allen
Scritōr: David Reuben • Woody Allen
Atōr: Woody AllenJohn CarradineGene Wilder
Lou JacobiLouise LasserLynn Redgrave
Tony RandallBurt ReynoldsAnthony Quayle
Elaine GiftosGeoffrey HolderElaine Giftos
Müsica: Mundell Lowe
Léngua: IngléśItagliàṅ
Dürä dal film: 88 minüt
Nasiōṅ: Stat Unî


«
Vuàtar a n î vdû gnint in fiṅ tant che a n î vdû incòsa.»
(Tagline dal film)


Tutto quello che avreste voluto sapere sul sesso* (*ma non avete mai osato chiedere) (Tut qvél ch'a 'rî sèmpar vlû savēr dal sès ma ch'a n î mai abû 'l curàǵ ad dmandàr) 'l è na cumèdia americàna a epiśòdi dal 1972 ad Woody Allen trat da 'n lìbar p'r insgnàr al sès dal studióś e dutōr David Reuben. La pelìcula la s vèra faghénd védar na sfilaràda ad cunèṅ biànc.

Al film 'l à fat sù óltar 18 migliòṅ ad dòlar, un sucès dimóndi grand esénd-an custâ sōl dū.

In uriginàl 'l epiśòdi Parchè sèrti dóni faṅ-i fadìga a rivàr a 'l urgàśum?, ambintâ in Itâglia, 'l è girâ in dla léngua ad Dante e anc Woody Allen al s adàta. In dla versiòṅ dal nòstar paéś però 'l è stâ ardupiâ listés.

Sunt

  1. Gl'afrudiśìac cònt'n-i? - Un bufòṅ ad cōrt (Woody Allen) a n è bòṅ ad far rìdar gnanc i caṅ e anc al rè (Anthony Quayle) e la regìna (Lynn Redgrave) i faṅ fadìga a cumpatìr-'s-al. Quànd al minciòṅ al s insùggna sò pàdar, chi lò al gh órdna 'd andàr a lèt cun la regìna o sinò al n gh'arà mai paś. Ma a n è minga un quèl fàcil anc parchè lē la gh'à adòs na sìngia ad castità.
  2. Cuś è-la la sudumìa? - Al psicòlug dutōr Ross (Gene Wilder) al cgnós un pasiènt nóṿ (Titos Vandis), ad mistēr pastōr e fradèl 'd òṅ di suo ch'al vénd di tapē, ch'l è rivâ in di Stat Unî diretamènt da l'Armègna. Chi lò, ch'al s éra inamurâ dla sò pégra Daisy, gusànd-la anc, al créd ch'la bèstia l'àppia śmis 'd amàr-al e 'l vrév ch'al dutōr al faśìs quèl. Quànd al gh la pòrta però anc lì lò al pèrd al cōr par lē.
  3. Parchè sèrti dóni faṅ-i fadìga a rivàr a 'l urgàśum? - 'N óm itagliàṅ (Woody Allen) a n è briśa bòṅ ad far 'l amōr cun sò mujér (Louise Lasser) parchè lē la fà fadìga a catàr-an gust. Lò al próa a far da tut (pascàr i sò punt sensìbii, druàr un vibradōr, ...) ma 'n gh'è vèrs, 'l è listés che ciucàr na spòrta róta. Un dè, sénsa vlér, al vèṅ a savér ch'a lē a gh piàś dimóndi far-'l a l'ària vèrta, p'r al perìcul 'd èsar vdùda da chi àtar.
  4. Èṅ-i i travistî di fnòć? - Quànd dū muróś i decìdan finalmènt ad cgnósar i sò genitōr, òṅ ad qvist chè, Sam (Lou Jacobi), al s fà védar par śbali cun di vistî da dóna adòs e tut acsè i vènan a savér al sò visi segrét tgnû lugâ durànt al sò matrimòni durâ trént'an. Sò mujér la 'l capìs ma la gh rèsta mâl listés parchè la 'l arév vlû savér prima in tut al manéri.
  5. Chi èṅ-i i visiōś sesuài? - Durànt un quiz televiśìṿ, ciamâ "Quàl è'l al mè visi?", al cuntutōr dal prugràma Jack Barry al fà cla dmanda chè e la rispòsta l'è: «Chi vōl far véd'r al sò cas in sla mèttro a 'n rabèṅ ch'al pèrd la tèsta p'r i calsét ad séda e ch'a gh vèṅ dûr quànd i al lìgan e quànd i dróan la scùria sèg in dal méntar che sò mujér la ś mét a sēdar a i sò pē magnànd dla carna ad ninét».
  6. I studi e gl'esperimènt in sal sès èṅ-i quèi da cuntàr-'g insìma? - Victor (Woody Allen) al fà 'l asistènt p'r al dutōr Bernardo (John Carradine), òṅ ch'l à pasâ tuta la sò vita a studiàr al sès. Dòp avér dâ 'n strap in màchina a la giurnàlista Helen (Heather MacRae), ch'la vliva far dal dmandi a 'l prufesōr, chi lōr dū i s réndan cònt che Bernardo 'l è mat dal tut e ch'l è sòlit far di esperimènt cóntar la léǵ. Da 'l laburatòri a salta fóra anc na téta gigànta ch'la và avànti strabalsànd.
  7. Cuś a sucéd durànt na śburàda? - Durànt na ciuladìna, un śburàdèṅ (Woody Allen) al gh'à da preparàr-as, a dita ad dū uperadōr dal sarvèl (Burt Reynolds e Tony Randall), p'r al sò viàś ma al gh'à dimóndi dubi.

Culegamènt estéran