Travolti dal destino

Da Wikipedia.
Jump to navigation Jump to search

C'l artìcul chè 'l è scrit in Miranduléś Emiliàn

Video-x-generic.svg Swept Away
Travolti dal destino
Travolti dal destino.png
Giannini e la Madonna e in na figùra dal film
Spasâ via da 'l destîṅ
2002
Regia: Guy Ritchie
Scritùr: Lina Wertmüller • Guy Ritchie
Atùr: Francis PardeilhanJeanne Tripplehorn
MadonnaAdriano GianniniFrancis Pardeilhan
George AntoniYorgo VoyagisElizabeth Banks
Ricardo PernaMichael BeattieDavid Thornton
Müsica: Michel Colombier
Lengua: IngléśItagliàṅGrèc
Dürä dal film: 89 minüt
Nasiòṅ: Stat UnîItàglia


«
Piutòst che baśàr-at a m farév un ninét, simiòṅ!»


Travolti dal destino (Spasâ via da 'l destîṅ) 'l è na cumèdia dal 2002 ad Guy Ritchie. L'è 'l arfacimènt 'd un film itagliàṅ dal 1974, Travolti da un insolito destino nell'azzurro mare d'agosto dla Lina Wertmüller. Custàda déś migliòṅ ad dòlar a 'l incìrca, la 'n à fat sù sōl òṅ.

Al film 'l à vins sinc Razzie Awards in dal 2002, p'r al film più brut, par l'atōra più lòfi (Madonna), p'r al regìsta più scars (Guy Ritchie), par la còpia misćiàda pèś (Madonna e Adriano Giannini, fiōl ad Giancarlo prutagunìsta dal film uriginàł) e par 'l arfacimènt più schivóś.

Sunt

L’Amber Leighton (Madonna) l'è na dóna americàna pîna 'd bèsi e dimóndi visiàda e arugànta, spuśàda cun 'n imprendidōr dn'indùstria ad madśìni, Anthony (Bruce Greenwood). Insém a di àt'r amìg, Todd (Michael Beattie), la Marina (Jeanne Tripplehorn), Michael (David Thornton) e la śōvna Debi (Elizabeth Banks), la còpia la decìd ad far-as na vacànsa in cruśéra p'r i mâr dal Mediterraneo a bōrd dla nâṿ 'd un capitàṅ grèc (Yorgo Voyagis) in du a lavōra anc al marinàr sicigliàṅ Giuseppe Cuccurullo (Adriano Giannini) dit Peppe. L’Amber la gh'à sèmpar quèl da dir e la n pèrd ucaśiòṅ par dar-'g adòs e par far-as sarvìr da lò esénd ch'l'è anc na capitalìsta sfegatàda. Giuseppe al fà dimóndi fadìga a mandàr śò 'l ròsp ma pò al tîṅ a drē a 'l cunsìli dal capitàṅ ch'al gh diś ad lasàr pèrdar parchè i ric i èṅ fat acsè.

Un dè l’Amber la dmanda a Giuseppe ad far-as scarusàr da lò in barca p'r andàr da i sò amìg ch'i s éran śluntanâ in cal méntar p'r andàr a védar dal gròti in n'ìśula lè davśèṅ. 'L itagliàṅ al gh al scunsìlia parchè a gh'è dimóndi curènt e pò 'l è tard, 'l è dagnóra basōra, ma a n gh'è vèrs, qvàla là l'è pèś 'd un bric quànd la s mét quèl in dla suca. Purtròp durànt al viàś al mutōr a sa śbraga e i dū i finìs'n in sn'ìśula deśèrta, sénsa magnàr sèg. Giuseppe 'l è bòṅ ad cavàr-'s-la da par lò, al s fà anc na balèstra ad furtùna par ciapàr al pés, méntar l’Amber l'è n'imbalsàda ch'la piga in un mónd in dua i bèsi i n vàlan gnint. Adès par scampàr l'è custréta a far afidamènt a 'l sicigliàṅ ch'al gh cmanda ad ciamàr-al padròṅ e ad lavàr-'g i pagn e far da magnàr par lò. Quànd lē la s arvòlta sèg, lò al la giùsta mulànd-ag dū sćiafòṅ. C'n al tèmp però lē la taca a inamuràr-'s ad lò tant ch'un dè, anc s'la véd na nâṿ ch'la s davśìna da cla banda, lē la s lóga p'r armàgnar lè c'n al sò marinàr.

Culegamènt estéran