Ti ho visto uccidere
|
C'l artìcul chè 'l è scrit in
Miranduléś |
 Witness to Murder
| ||
| Ti ho visto uccidere | ||
 La Stanwyck, Merrill e Sanders in na figùra dal film | ||
| A t ò vdû masàr 1954 | ||
|---|---|---|
| Regìa: Roy Rowland | ||
| Scritōr: Chester Erskine | ||
| Atōr: Barbara Stanwyck • George Sanders Jesse White • Gary Merrill • Claire Carleton Harry Shannon • Lewis Martin • Harry Tyler | ||
| Müsica: Herschel Burke Gilbert | ||
| Léngua: Ingléś • Tedésc | ||
| Dürä dal film: 83 minüt | ||
| Nasiōṅ: Stat Unî | ||
Ti ho visto uccidere (A t ò vdû masàr) 'l è 'n thriller dramàtic americàṅ dal 1954 ad Roy Rowland girâ in Califòrgna in biànc e négar. 'L è stâ scrit par Chester Erskine ch'l à anc prudót la pelìcula.
Sunt
La Cheryl Draper (Barbara Stanwyck) l'è na mistra laureàda in achitetùra. Na nòt la s déśda e par la fnèstra la véd 'n óm ch'al stà in dal palàs darènt a 'l suo strusàr na dóna. La Cheryl la cònta tut a la pulisìa ma quànd chi lōr i vàn'n in d'l apartamènt dal sgnōr Albert Richter (George Sanders), scritōr sénsa sucès ad lìbar ch'i pòrt'n avànti gl'idéi dal nichilìśum, i n gh càtan gnint parchè chi lò 'l iva bèla lugâ 'l cadàv'r in un baùl in 'n apartamènt vōd lè davśèṅ. Al tenènt Lawrence Mathews (Gary Merrill) 'l è sicûr ch'la dóna la s sia insuniàda incòsa.
La Cheryl la và avànti listés cuma 'n bric e la s fà vèrar cun na scuśa 'l apartamènt 'd Albert méntar lò 'l è via. Su 'n tàvul la mistra la véd i dū buclèṅ dla vitma e la i pòrta via par far-i véd'r a Lawrence ma quànd la gh i dà lò al gh diś che Richter 'l iva in cal méntar denunsiâ 'l furt e che gl'urcèṅ i ér'n ad sò mujér mòrta in Germàgna prima che lò 'l andìs a star in di Stat Unî dòp avér scanślâ 'l sò pasâ da naśìsta.
Méntar Lawrence al taca a 'ndàr fóra a séna cun la Cheryl, in un parc a vîṅ catâ 'l còrp nûd dla dóna cupàda cla nòt là. Albert, ch'l è drē a spuśàr-as cun na dóna pîna 'd bèsi, al taca a mandàr-as dal létri, druànd la màchina par scrìvar dla Draper, cun scrit insìma „A t ò vdû masàr“ faghénd finta ch'i sìan dla mistra par far-la pasàr par n'insiminìda ch'la gh dà sèmp'r adòs e che dònca la gh'à da èsar farmàda. Al capitàṅ Donnelly (Harry Shannon) al decìd ad mandàr-la in manicòmi par curàr-la e par tgnir-la 'd òć p'r un sèrt perìud.