The Lost
|
C'l artìcul chè 'l è scrit in
Miranduléś |
 The Lost
| ||
 La Shay Astar e Marc Senter in na figùra dal film | ||
| Al pardû 2006 | ||
|---|---|---|
| Regìa: Chris Sivertson | ||
| Scritōr: Jack Ketchum • Chris Sivertson | ||
| Atōr: Marc Senter • Shay Astar • Robin Sydney Alex Frost • Megan Henning • Michael Bowen Ed Lauter • Dee Wallace • Erin Brown | ||
| Müsica: Tim Rutili | ||
| Léngua: Ingléś | ||
| Dürä dal film: 119 minüt | ||
| Nasiōṅ: Stat Unî | ||
The Lost (Al pardû) 'l è 'n thriller dramàtic americàṅ dal 2006 ad Chris Sivertson trat da 'l rumànś umònim ad Jack Ketchum.
Sunt
Ray Pye (Marc Senter) 'l è 'n ragàs visiâ, preputènt e vanitóś ch'al lavóra malvluntéra in dal mutèl ad sò màdar Jane (Helen Siff), al Starlight. P'r èsar più fîg al s truca anc e 'l è sèmpar vistî bèṅ.
Un dè, méntar 'l è a casa in di bòsc insém a la sò muróśa Jennifer (Shay Astar), che lò 'l impinìs ad còran, e 'l sò amìg Tim Bess (Alex Frost), ch'al gh prucùra dla dròga, 'l incróśa dū ragàsi andàdi lè a ciapàr al sōl e a far campéǵ, la Lisa Steiner (Erin Brown) e l’Elise Hanlon (Ruby Larocca). Infastidî da 'l fat ch'al dū śōvni i ìvan tacâ a baśàr-as, e p'r al gust ad masàr e 'd sintìr-'s un pàd'r-etéran, Ray al decìd ad cupàr-li a sćiuptàdi, pò 'l custrìnś la Jennifer e Tim a jutàr-'l a lugàr incòśa e a tgnir la bóca saràda. Al detective Charlie Schilling (Michael Bowen) al tōś in maṅ al caś ma al n è minga bòṅ 'd incastràr al delinquènt.
Soquànt an dòp Ray al cuntìnua a divertìr-as cuma s'a n fus sucès gnint, urganiśànd dal fèsti in du a gira dimóndi alcol e dròga e faghénd al galét c'n al ragàsi cuma la studènta pîna 'd bèsi Katherine Wallace (Robin Sydney) ch'la decìd 'd andàr a lèt sèg. Cun la dóna dal pulisìi rivàda da pôc in dal sò mutèl, la Sally Richmond (Megan Henning), al ròbi i èṅ difarènti parchè chi lē la n in vōl pròpria minga savēr, esénd-as misa insém a 'n óm ad ssant'an ciamâ Ed Anderson (Ed Lauter).
Dascargâ da la Katherine e anc da la Jennifer par Tim, cun chi lē stufa 'd èsar tratàda sèmpar mâł, Ray al pèrd la tèsta e 'l decìd ad tiràr incóra fóra 'l sćiòp par far-'g-la pagàr a cal dū là e anc a la Sally ch'la 'l iva sèmpar parâ via.