The Kovak box - Controllo mentale
|
C'l artìcul chè 'l è scrit in
Miranduléś |
 The Kovak box
| ||
| The Kovak box - Controllo mentale | ||
 Hutton e la Lucía Jiménez in na figùra dal film | ||
| La scatla 'd Kovak - Cuntròl mentàł 2006 | ||
|---|---|---|
| Regìa: Daniel Monzón | ||
| Scritōr: Daniel Monzón • Jorge Guerricaechevarría | ||
| Atōr: Timothy Hutton • Lucía Jiménez • Gary Piquer David Kelly • Georgia Mackenzie • Iván Morales Annette Badland • Colin Stinton • Luis Callejo | ||
| Müsica: Roque Baños | ||
| Léngua: Spagnōl • Ingléś • Francéś • Tedésc | ||
| Dürä dal film: 102 minüt | ||
| Nasiōṅ: Spaggna • Régn Unî | ||
The Kovak box - Controllo mentale (La scatla 'd Kovak - Cuntròl mentàł) 'l è 'n thriller dal 2006 ad Daniel Monzón.
In dla pelìcula a s sènt da spés al pès „maladî“ Gloomy Sunday dla Billie Holiday, cgnusû in Itàglia cuma Triste domenica cantâ da la Nilla Pizzi in dal 1952, un braṅ ch'al dascór ad vilimènt e 'd suicìdi ch'a s diś 'l àppia purtâ dimóndi gint a tōr-as la vita tant ch'la BBC la 'l à pruibî in fiṅ a 'l 2002.
Sunt
David Norton (Timothy Hutton), scritōr americàṅ ad rumànś ad fantasiénsa, 'l è invidâ a tgnir na cunferénsa in dl'ìśula 'd Majòrca in Spaggna. Dòp ès'r arivâ in aparéć insém a la sò muróśa Jane (Georgia Mackenzie) e avēr cgnusû 'n sò fan ungheréś, Frank Kovak (David Kelly), i tàc'n a sucédar di suicìdi ad gint ch'la s buta śò p'r i balcòṅ sénsa mutìṿ. Anc la Jane l'è una 'd qvi lè.
La Silvia (Lucía Jiménez), na turìsta ch'l'iva tòlt al stés vōl ad David, méntar l'è sóta la dócia la sènt al sò tefunèṅ sunàr. Rispundénd a la ciamàda la sènt la canta Gloomy Sunday dla Billie Holiday e subìt dòp la s buta śò par la fnèstra dal sò palàs ma, bcand al tlòṅ 'd un bar, la s salva finénd a 'l uśdàł. Chè la cgnós David, ch'l éra andâ a piànśar la sò Jane, e i dū i fàn'n a mènt che tut al parsòni ch'i s èṅ cupàdi i gh'ìv'n un microchip insfilsâ in dla gnuca, anc la Silvia la gh 'l à.
David al diś a la ragàsa ch'al sò prim lìb'r al dascurìva pròpria 'd un chip mis da 'l guèran in dla suca di sò sitadèṅ par far in manéra ch'i s masìsan da par lōr se par caś i gh fùs'n andâ cóntar. A salta fóra ch'a gh'è na lista 'd parsòni ch'i aṅ patî cal tratamènt lè, tuti qvéli ch'i ér'n in sal vōl vèrs gl'Ìśuli Baleàri.